Azərbaycan Dillər Universitetinin (ADU) Psixologiya və Pedaqogika kafedrasının müəllimləri – p.f.d., baş müəllim Şəfiqə Tahirova və Türkan Ömərova – 13–16 noyabr tarixlərində Özbəkistanın Renessans Təlim Universitetinin təşkil etdiyi beynəlxalq konfransda iştirak ediblər. “Elmin və mədəniyyətin inkişafı: Renessans ideyalarının müasir elmi proseslərdə təzahürü” mövzusuna həsr olunmuş konfrans müxtəlif ölkələrdən olan tədqiqatçıları bir araya gətirərək elmin və mədəniyyətin qarşılıqlı inkişafına dair müzakirələr üçün mühüm elmi platforma yaradıb.
“Tehsil365” bildirir ki, tədbir çərçivəsində ADU-nun Psixologiya və Pedaqogika kafedrasının müəllimləri öz məqalələrini təqdim edərək çıxış ediblər. Renessans dövrünün insan düşüncəsinin sərhədlərini genişləndirən, yaradıcılığı və elmi araşdırmanı təşviq edən ideyalarının bu gün də aktuallığını qoruduğu vurğulanıb. Bildirilib ki, müasir dövrdə elmi innovasiyalar, multidissiplinar yanaşmalar və qlobal əməkdaşlıq prinsipləri məhz Renessans düşüncəsinin davamı kimi formalaşmaqdadır.
Konfransda səsləndirilən elmi məruzələr Renessans ideyalarının əsasını təşkil edən humanizm, yaradıcı təfəkkür və biliklərin inteqrasiyasının bu gün də elmi proseslərin inkişafına ciddi təsir göstərdiyini ortaya qoyub. Xüsusilə informasiya texnologiyaları, təhsil, mədəniyyət araşdırmaları və sosial elmlər sahəsində bu təsirin aydın şəkildə hiss olunduğu qeyd edilib.
ADU nümayəndələrinin sözlərinə görə, belə bir tədbirdə iştirak həm elmi biliklərin artırılması, həm də müxtəlif sahələrdən olan tədqiqatçılarla fikir və təcrübə mübadiləsi aparılması üçün geniş imkan yaradıb. Konfrans çərçivəsində qurulan əməkdaşlıq əlaqələrinin gələcək elmi fəaliyyətlərə mühüm töhfə verəcəyi bildirilib.