Azərbaycanın Özbəkistandakı səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzinin layihəsi çərçivəsində keçirilən “Azərbaycan sənət və ədəbiyyat günləri” davam etməkdədir. Bu tədbirlər çərçivəsində Fərqanə Dövlət Universitetində xalqımızın görkəmli ədəbiyyat nümayəndəsi, Xalq şairi Bəxtiyar Vahabzadənin adını daşıyan Azərbaycanşünaslıq auditoriyasının açılışı olub.
“Tehsil365” bildirir ki, bu barədə AZƏRTAC-a Azərbaycan Mədəniyyət Mərkəzindən məlumat verilib.
Bildirilib ki, açılış mərasimində universitetin rektoru Bahodirjon Şerməhəmmədov və Heydər Əliyev adına Azərbaycan Mədəniyyət Mərkəzinin direktoru Akif Marifli iştirak edərək yeni yaradılmış auditoriyanı rəsmi şəkildə istifadəyə veriblər.
Universitet rektoru çıxışında Əlişir Nəvainin hikmətli misralarını xatırladaraq Azərbaycan və Özbəkistan xalqlarını birləşdirən mənəvi və tarixi bağların dərinliyini xüsusi vurğulayıb. O əlavə edib ki, iki ölkə arasında humanitar və mədəni əməkdaşlığın genişlənməsi, xüsusilə universitetlərarası əlaqələrin möhkəmlənməsi gənclərin bir-birinin dilini, ədəbiyyatını və mədəniyyətini daha yaxından tanımasına xidmət edir. Rektor qeyd edib ki, B.Vahabzadə yaradıcılığı iki qardaş xalqın ortaq ədəbi dünyagörüşünün mühüm sütunlarından biridir.
Azərbaycan Mədəniyyət Mərkəzinin direktoru Akif Marifli bildirib ki, Bəxtiyar Vahabzadə adına Azərbaycanşünaslıq auditoriyasının yaradılması iki ölkə arasında dostluq, qardaşlıq və humanitar əməkdaşlıq üçün yeni bir körpü rolunu oynayacaq. Vurğulayıb ki, Azərbaycan və Özbəkistan prezidentləri tərəfindən irəli sürülən yüksəksəviyyəli siyasi dialoq bu kimi mədəni layihələrin həyata keçirilməsinə güclü dəstək verir və qarşılıqlı əməkdaşlığın davamlılığını təmin edir. Onun sözlərinə görə, bu məkan yalnız simvolik əhəmiyyət daşımır, həm də tələbələr üçün Azərbaycan dili, ədəbiyyatı, tarixi və mədəniyyəti üzrə dərslərin və elmi müzakirələrin aparılacağı praktik tədris mühiti kimi fəaliyyət göstərəcək. Direktor əlavə edib ki, auditoriya həmçinin birgə layihələrin, tələbə-müəllim görüşlərinin və ədəbi müzakirələrin keçirilməsi üçün açıq platforma olacaq.
Bəxtiyar Vahabzadə adına Azərbaycanşünaslıq auditoriyası həm tədris, həm də mədəni təqdimat məkanı kimi xüsusi zövqlə formalaşdırılıb. Auditoriyanın vizual tərtibatında Azərbaycan və Özbəkistan arasındakı dostluq və əməkdaşlığı simvolik şəkildə ifadə edən Prezident portretləri, dövlət bayraqları, eləcə də Azərbaycanın xəritəsi, gerbi və himninin bədii təqdimatı xüsusi konseptual əhəmiyyət kəsb edir.
Burada Xalq şairi Bəxtiyar Vahabzadənin portreti və yaradıcılığını tanıdan məlumatlar, görkəmli ədəbiyyat və mədəniyyət xadimlərinin fotoları, eləcə də Azərbaycan mədəni irsinin incəliklərini ifadə edən xalça və kəlağayı nümunələri auditoriyanın estetik ruhunu tamamlayır.
Kitab rəflərində Azərbaycan ədəbiyyatı, tarixi, musiqisi və humanitar əlaqələrinə dair geniş tematik spektri əhatə edən nəşrlər yer alıb. Auditoriyada, həmçinin Azərbaycan mədəniyyətini simvolizə edən dekorativ-tətbiqi sənət nümunələri və xatirə suvenirləri nümayiş etdirilir.
Azərbaycan musiqi ənənəsini yaşadan tar, kamança və qaval kimi milli alətlər auditoriyanın mədəni təqdimatını daha da zənginləşdirir və bu məkanı tələbələr üçün həm mənəvi, həm də maarifləndirici bir mərkəzə çevirir.