Bakı Dövlət Universitetinin (BDU) Şərqşünaslıq fakültəsində yapon dili və ədəbiyyatı ixtisasının açılmasının 25 illiyinə həsr edilmiş yubiley tədbiri keçirilib.
“Tehsil365” bildirir ki, BDU-dan AZƏRTAC-a bildirilən məlumata görə, tədbirdə çıxış edən beynəlxalq əlaqələr üzrə prorektor Şahin Pənahov BDU-nun Yaponiyanın ali təhsil müəssisələri ilə əməkdaşlığının genişləndiyini və bu əlaqələrin inkişafında Şərqşünaslıq fakültəsinin Uzaq Şərq dilləri və ədəbiyyatı kafedrasının böyük rolu olduğunu bildirib. O qeyd edib ki, 2000-ci ildən BDU-nun Şərqşünaslıq fakültəsində yapon dili tədris olunmağa başlayıb. BDU tələbələri yapon dili ilə yanaşı, yapon ədəbiyyatını, coğrafiyasını, iqtisadiyyatını, mədəniyyətini öyrənir, ildən-ilə bu sahəyə maraq daha da artmaqdadır. Şahin Pənahov, eyni zamanda, BDU-nun təşkilatçılığı ilə mütəmadi olaraq yapon dili üzrə natiqlik müsabiqələrinin təşkil edildiyini diqqətə çatdırıb.
Yaponiyanın ölkəmizdəki səfiri Katsuya Vatanabe iki ölkə arasında münasibətlərin inkişafında xüsusi yer tutan Şərqşünaslıq fakültəsinin Uzaq Şərq dilləri və ədəbiyyatı kafedrasının fəaliyyətini yüksək qiymətləndirib, kafedrada yapon dilinin tədrisinin yüksək səviyyədə olduğunu vurğulayıb. Səfir gələcəkdə bu məzunların ixtisasları üzrə işləyərək Yaponiyanın mədəniyyətini təbliğ etməyə böyük töhfə verəcəyini vurğulayıb.
Şərqşünaslıq fakültəsinin dekanı Aydan Xəndan fakültənin Yaponiyanın bir sıra universitetləri ilə əməkdaşlıq etdiyini, yapon dilinin öyrənilməsi sahəsində çoxşaxəli iş aparıldığını bildirib: “Ümid edirəm ki, yapon dili üzrə mütəxəssislərin sayı ildən-ilə artacaq və Yaponiya ilə olan möhkəm bağlarımız daha da güclənəcək. Fakültəmizin yetirmələri Azərbaycan-Yaponiya əlaqələrinin inkişafında öz xidmətlərini göstərəcək və bir çox nailiyyətlərə imza atacaqlar”.
Uzaq Şərq dilləri və ədəbiyyatı kafedrasının müdiri professor Oqtay Cəlilbəyli yapon dili və ədəbiyyatı ixtisasının yaranmasının 25 illik tarixi haqqında hesabat verib.
Digər çıxış edənlər bu ixtisasın tədris edilməsinin əhəmiyyətindən danışıblar.
Tədbirdə tələbələrin ifasında yapon dilində mahnılar ifa olunub.
Sonda Yaponiyanın Azərbaycandakı səfiri Katsuya Vatanabe “Yapon dili və ədəbiyyatı” ixtisasının 25 illik yubileyi münasibətilə Şərqşünaslıq fakültəsinin dekanı Aydan Xəndan və Uzaq Şərq dilləri və ədəbiyyatı kafedrasının müdiri Oqtay Cəlilbəyliyə sertifikat təqdim edib.