“Mavi balina” oyunu ilə bağlı narahatlıqlar cəmiyyətdə, xüsusilə də ailələr və təhsil müəssisələri arasında ciddi müzakirələrə səbəb olur.
Təhsil eksperti Əli Ələkbərov “Tehsil365”ə açıqlamasında bildirib ki, bu kimi onlayn oyunlar yeniyetmələrin psixoloji durumuna təsir göstərərək təhlükəli davranışlara sövq edir və bəzi hallarda faciəvi nəticələrə gətirib çıxara bilər.
Ekspert hesab edir ki, məsələ yalnız texniki nəzarət və ya valideyn qadağası ilə həll olunmur. Məktəblər şagirdlərin sosial-emosional vəziyyətini izləməli, psixoloqlar bu prosesi aktiv şəkildə müşahidə etməlidir:
“Məktəblər təkcə bilik verən yer deyil. Davranış dəyişikliyi, özünə qapanma, aqressiya və psixoloji gərginlik vaxtında görülməli, məktəb-valideyn əməkdaşlığı davamlı olmalıdır.”
Ələkbərov valideynlərin rolunu daha fundamental hesab edir. Onun sözlərinə görə, nəzarət yalnız sosial şəbəkəyə baxmaqla məhdudlaşmamalıdır:
“Uşaqların kimlə yazışdığına baxmaq kifayət deyil. Əsas məsələ səmimi ünsiyyət, dinləmək, anlayış və etimad yaratmaqdır. Uşaq narahatlığını paylaşa bilirsə, o artıq təhlükədən bir addım uzaqdadır.”
Ekspert həmçinin intihar hadisələrindən sonra valideynin cəzalandırılması məsələsinə toxunub:
“İntiharın səbəbi heç vaxt tək olmur. Psixoloji, sosial, ailədaxili və digər faktorlar var. Məsuliyyəti yalnız valideynə yükləmək nə doğru, nə də ədalətlidir. Hüquqi məsuliyyət daha çox zərərli məzmunu yayanlara aid olmalıdır.”
Əli Ələkbərovun fikrincə, cəmiyyətin bu kimi faciələri azaltmasının ən effektiv yolu maarifləndirmədir:
“Cəza problemi həll etmir, yükü artırır. Təhsil, ailə və media birlikdə çalışmalı, uşaqlara psixoloji dayanıqlıq qazandırmalı və internet riskləri barədə məlumatlılıq artırılmalıdır.”
Ekspert bildirib ki, “Mavi Balina” kimi təhlükələrə qarşı mübarizə yalnız kompleks və birgə fəaliyyət nəticəsində real təsir göstərə bilər.