Ailədə davamlı şəkildə yaranan gərginlik və qarşıdurmalar uşaq psixologiyasında dərin izlər buraxır. Gərgin mühitdə böyüyən uşaq öz hisslərini idarə etməkdə çətinlik çəkir, sosiallaşmada problem yaşayır və tədris prosesində uğursuzluqla qarşılaşa bilər.
“Tehsil365”ə açıqlama verən psixoloq Fəridə Musəvi bildirib ki, ailədə yaşanan münaqişələr uşaqlarda daxili qapanıqlığa və tədris prosesinə uyğunlaşmada ciddi problemlərə yol açır. O qeyd edib ki:
“Uşaqlar nə qədər yaxşı oxusalar da, ailədə daima münaqişə görən uşaq dərslərinə tam adaptasiya ola bilmir. Məktəbdə müəllimlərin suallarına cavab verməkdə çətinlik çəkir, yoldaşlarına uyğunlaşa bilmir və daxilə qapanır”.
Psixoloqun sözlərinə görə, valideynlər hər hansı problemi uşağın yanında müzakirə etməməli və konfliktləri ikilikdə həll etməyə çalışmalıdır:
“Təəssüf ki, bu gün ailə daxilində yaşanan problemlər təkcə ev çərçivəsində qalmır. Qohumların qarışması vəziyyəti daha da alovlandırır. Hər kəs öz təcrübəsinə əsasən fikir bildirir və nəticədə problem böyüyür. Ailə daxilində ‘közərmiş ocaq’ yaranır və həmin ocaqda böyüyən uşaqlar ‘yanır’. Buna görə valideynlər belə vəziyyətlərdə qohumlara deyil, peşəkar psixoloqlara müraciət etməlidir. Əks halda bu, ailə üçün ağır nəticələrə gətirib çıxara bilər”.