Xəzər Universitetinin Dillər və ədəbiyyatlar departamenti və Bakı Yunus Əmrə İnstitutunun birgə təşkilatçılığı ilə T.C. Nevşehir Hacı Bektaş Veli Universitetinin professoru, tanınmış alim və şair Bayram Durbilməzlə görüş keçirilib. Tədbir türk xalqlarının ortaq mədəni və ədəbi dəyərlərinin tələbələr arasında təbliğini gücləndirmək məqsədilə təşkil olunub.
“Tehsil365” xəbər verir ki, Xəzər Universitetindən AZƏRTAC-a bildirilən məlumata görə, görüşü departament müdiri Dilbər Zeynalova açaraq universitetdə türkoloji istiqamətin inkişafı və tələbələrin Türk dünyasının mədəni irsi ilə yaxından tanış olması üçün görülən işlər barədə məlumat verib.
Daha sonra professor Bayram Durbilməz “Türk birliyi kontekstində ədəb və ədəbiyyat” mövzusunda məruzə edərək “ədəb” anlayışının türk mədəniyyətində təkcə davranış modeli deyil, həm də mənəvi kimliyi formalaşdıran fundamental dəyər olduğunu vurğulayıb. Orxon-Yenisey abidələri, klassik sufi poeziyası və müasir türk ədəbiyyatından nümunələrə əsaslanan alim, ədəb konseptinin türk ədəbiyyatının bütün dövrlərində dəyişməyən estetik xətt kimi qorunduğunu qeyd edib.
Məruzə tələbələrin böyük marağına səbəb olub. Sual-cavab hissəsində tələbələr professora müxtəlif suallar ünvanlayıb, həmçinin Könül Hüseynova, Fidan Əzimova və Nazilə Ağayeva alim-şairin müxtəlif illərdə qələmə aldığı şeirlərdən nümunələr səsləndiriblər. Alim-şair tədbirin sonunda özünün “Sürməli yarım” şeirini söyləyib.
Görüşün sonunda Humanitar, Təhsil və Sosial Elmlər fakültəsinin dekanı Milana Abbasova alim Bayram Durbilməzə təşəkkür plaketi təqdim edib.
Qonaq müəllifi olduğu kitabları universitetin kitabxanasına hədiyyə edib.