Xaricdə təhsilə marağın artması günümüzün qlobal rəqabət şəraitinin nəticəsi kimi ortaya çıxır. Gənclər daha geniş imkanlar, keyfiyyətli təhsil və yeni təcrübələr əldə etmək üçün müxtəlif ölkələrin universitetlərinə üz tuturlar. Fərqli mədəniyyətlərlə tanış olmaq, dil biliklərini inkişaf etdirmək və praktiki bacarıqlar qazanmaq imkanı xaricdə təhsili daha cəlbedici edir.
Bu barədə”Tehsil365”ə açıqlama verən Təhsil eksperti Əmrah Həsənli qeyd edib.O bildirir ki:
“Bu gün gənclərin xaricdə təhsilə daha çox üstünlük verməsinin əsas səbəbləri bir neçə istiqamətdə cəmlənir. İlk növbədə, qlobal dünyada rəqabət mühiti dəyişib və hər kəs daha geniş imkanlara çıxış əldə etmək istəyir. Xarici universitetlər tələbələrə həm akademik bilik baxımından zəngin mühit, həm də fərqli tədqiqat ənənələri təqdim edir. Bu isə gənclərin özünü inkişaf etdirməsi üçün daha çevik və çoxşaxəli platforma yaradır.
Digər bir mühüm məqam, xaricdə təhsil alan gənclərin həm dil biliklərini, həm də çoxmədəniyyətli mühitdə ünsiyyət bacarıqlarını inkişaf etdirməsidir. Bu gün əmək bazarı artıq yalnız diplomla ölçülmür. Mühitə adaptasiya bacarığı, qlobal düşüncə tərzi və fərqli ölkələrin təcrübələrini özündə birləşdirmək qabiliyyəti ən azı akademik bilik qədər əhəmiyyətlidir. Buna görə də gənclər təhsil aldıqları ölkənin mədəniyyətini, iqtisadi modelini, idarəetmə sistemini yaxından öyrənməyə çalışırlar.
Əlavə olaraq, xarici universitetlərin bir çoxunda tədrisin praktik yönümlü olması, startap mədəniyyətinin inkişaf etmişliyi və tələbələrin araşdırma layihələrinə real dəstək mexanizmlərinin mövcudluğu da mühüm rol oynayır. Gənclər yalnız nəzəriyyə deyil, həm də real praktik bacarıq qazanmaq istəyirlər. Bu baxımdan, xaricdə təhsil onlara həm bilik, həm də qlobal şəbəkə qazandırır.
Bütün bunlar onu göstərir ki, gənclərin xaricdə təhsilə marağı təkcə diplom almaq istəyi deyil, daha geniş dünyaya açılmaq, bilik və təcrübələrini qlobal səviyyədə formalaşdırmaq məqsədi daşıyır”.