Şuşa Dövlət Musiqili Dram Teatrının yaradıcı kollektivi bu gün görkəmli dramaturq Cəfər Cabbarlının “Solğun çiçəklər” əsəri əsasında hazırlanmış eyniadlı tamaşa ilə teatrsevərlərin qarşısına çıxacaq.
“Tehsil365” xəbər verir ki, səhnə əsərinin nümayişi saat 19:00-da baş tutacaq.
Tamaşa klassik Azərbaycan dramaturgiyasının mühüm nümunələrindən biri olan “Solğun çiçəklər” əsərinin süjet xəttinə əsaslanır. Əsər Saranın əmisi oğlu Bəhrama bəslədiyi saf məhəbbətdən, həmçinin tamahkarlıq və xəyanətin doğurduğu faciələrdən bəhs edir.
Əsərdə xüsusi olaraq Saranın analığı olan Gülnisənin həyata keçirdiyi ağır cinayətlər diqqət çəkir. O, əvvəlcə Saranın atasını zəhərləyir, daha sonra isə var-dövlətə sahiblənmək üçün Saranı Bəhramdan ayıraraq onun öz qızı ilə evlənməsinə nail olur. Hadisələrin sonunda Sara məkrin və vəfasızlığın qurbanına çevrilir.
Tamaşa həm Cabbarlı irsinin səhnədə yeni nəfəs alması, həm də aktyor oyununun yüksək emosional təsiri ilə seçilir. Bu günkü nümayiş üçün bilet satışı davam edir.