Astarada fəaliyyət göstərən mental arifmetika və məntiq müəllimi Əliyeva Dünya uşaqlara riyaziyyatı sevdirən pedaqoqlardan biridir. O, həm şəxsi həyatında keçdiyi çətinliklər, həm də müəllimlik təcrübəsi ilə formalaşan unikal yanaşması sayəsində bu gün bir çox şagirdin riyaziyyata olan münasibətini dəyişdirə bilir.
“Tehsil365” xəbər verir ki, Onunla riyaziyyat və məntiq tədrisinin əhəmiyyəti, çətinlikləri və gələcək planları barədə söhbətləşdik.
“Riyaziyyata sevgim çətinlik içindən yarandı”
Müəllimə xatırlayır ki, ibtidai sinif illəri heç də rahat keçməyib. Ailəsinin ağır dönemi səbəbindən dərslərə davamlı gedə bilməyib:
“Atam qəza keçirib komada qalırdı. Anam xəstəxanada idi, mən isə nənəmin evində qalırdım. Buna görə ibtidai sinifdə dərslərə az gedirdim. Hətta vurma cədvəlini 4-cü sinifdə öyrəndim. 5-ci sinifdə Bakıya köçdükdən sonra özümə söz verdim ki, oxuyacağam və hər şeyi bacaracağam.”
Bu qərar onun həyatını dəyişib. Sonradan Anna müəllimənin dəstəyi ilə riyaziyyata həvəsi daha da artıb:
“9-cu sinifdə riyaziyyatdan 3 alan şagird idim, amma müəlliməm mənə elə öyrətdi ki, 11-ci sinifdə buraxılışda 30 sualdan 29-nu yazdım.”
Müəllimlik fəaliyyətinə aparan yol
Əliyeva Dünya 2019-cu ildə universiteti bitirib, 2020-ci ildən isə məktəbdə müəllim kimi çalışmağa başlayıb. Lakin müəllimlik təcrübəsi hələ tələbəlik illərində formalaşıb:
“Hələ tələbə olanda uşaqlara kömək edirdim. Qrup yoldaşlarıma çətin mövzuları Anna müəllimənin metodu ilə sadə şəkildə izah edirdim. Öyrətmək mənə həzz verirdi.”
O, mental arifmetika sahəsində biliklərini inkişaf etdirmək üçün Nirvana Akademiyasında kurs keçərək beynəlxalq dərəcəli diplom da alıb. Bu diplom ona ibtidai sinif şagirdlərinə vurma cədvəlini daha asan öyrətməkdə kömək edir.
“Uşaqlara riyaziyyatı sevərək və əylənərək öyrədirəm”
Dünya müəllimənin əsas prinsipi – öyrənmə prosesini maraqlı etməkdir:
“Uşaqlar mənimlə dost kimi olduqlarını hiss edəndə, dərsimə də maraqla yanaşırlar. Sevilən müəllimin dərsi də sevilir.”
Onun sözlərinə görə, mental arifmetika və oyunlar vasitəsilə tədris şagirdlərdə həm marağı, həm də özünəinamı artırır.
Dərs proqramı və fərdi yanaşma
Hazırkı dərs proqramını normal hesab etsə də, müəllimə əlavə olaraq hər şagird üçün fərdi tapşırıq və metod hazırlanmasının vacibliyini vurğulayır:
“Hər şagird eyni öyrənmir. Müəllimin öz metodları olmalıdır. Zəif şagird mənim üçün yoxdur — əsas odur ki, öyrənmək istəyi olsun.”
Çətinliklər: psixoloji baryerlər
Ən böyük problem isə uşaqlara öncədən aşılanan riyaziyyat qorxusudur:
“Bəzi uşaqlara valideyn və ya çevrə deyir ki, ‘riyaziyyat sənlik deyil’. Uşaq buna inanır, psixoloji baryer yaranır. Bu inamı sındırmaq çox çətin olur.”
Valideyn dəstəyi – təhsilin əsası
Müəllimə valideyn rolunun vacibliyinə xüsusi diqqət çəkir:
“Valideyn–müəllim–şagird birləşəndə nəticə olur. Məktəblərdə valideynlər üçün seminarlar keçirilməlidir ki, onlar evdə uşağa necə yanaşacaqlarını bilsinlər.”
Texnologiya: beyin hesablaması öndə olmalıdır
Texnologiyanın faydalı olduğunu desə də, o, uşaqlarda beyin hesablamasının daha çox inkişaf etdirilməsini doğru sayır:
"Kalkulyator hər yerdə var, amma beyin hesablaması düşüncəni kəskinləşdirir. Erkən yaşdan hesablamaları beyində aparmağı öyrətmək lazımdır."
İmtahan hazırlığında metodlar
İmtahanlara hazırlıq zamanı əsas diqqət ilkin bacarıqların möhkəmləndirilməsinə yönəlir:
“Sürətli sınaqlar və sistemli təkmilləşdirmə əsas üsullarımdır.”
Gələcək hədəflər: Astarada mental arifmetika mərkəzi
Əliyeva Dünya gələcəkdə öz tədris mərkəzini açmaq niyyətindədir:
“Astarada hələ mental arifmetika mərkəzi yoxdur. Lap uşaq yaşlarından ‘sən bacarmazsan’ deyilən uşaqlara fərdi yanaşacağım bir mərkəz açmaq istəyirəm.”
Müəllimə Dünya Əliyeva riyaziyyat dərsini yalnız fənn kimi deyil, uşaqların düşüncə bacarığını formalaşdıran bir proses kimi görür. Onun məqsədi – hər bir şagirdin riyaziyyatdan qorxusunu aradan qaldırmaq, öyrənməni sevdirərək, əyləncəli mühitdə nəticəyə çatdırmaqdır.