Azərbaycanın Özbəkistandakı səfirliyinin nəzdində fəaliyyət göstərən Heydər Əliyev adına Azərbaycan Mədəniyyət Mərkəzinin təşkilatçılığı ilə keçirilən “Azərbaycan sənət və ədəbiyyat günləri” çərçivəsində Fərqanə Dövlət Universitetində geniş bədii konsert proqramı təqdim olunub.
“Tehsil365” xəbər verir ki,Fərqanə Dövlət Universitetinin rektoru Bahodirjon Şerməhəmmədov bildirib ki, Azərbaycan hər zaman Özbəkistan xalqına mənəvi cəhətdən yaxın olub. Rektor vurğulayıb ki, iki xalq arasındakı dərin humanitar bağlar bu gün də möhkəmlənməkdədir və bu kimi tədbirlər tələbələrin bir-birinin mədəni irsini daha dərindən öyrənməsinə şərait yaradır. O əlavə edib ki, belə təşəbbüslər gənclər arasında qarşılıqlı hörmət və mədəni yaxınlaşmanı daha da gücləndirir.
Azərbaycan Mədəniyyət Mərkəzinin direktoru Akif Mariflinin sözlərinə görə, Azərbaycan və Özbəkistan prezidentlərinin uzaqgörən siyasəti nəticəsində yaranan və möhkəmlənən müttəfiqlik humanitar əlaqələrin inkişafına geniş imkanlar açır və həyata keçirilən mədəni layihələr bu strateji tərəfdaşlığın ardıcıl davamını təşkil edir. O əlavə edib ki, tədbirin Xalq şairi Bəxtiyar Vahabzadənin anadan olmasının 100 illiyinə həsr olunması xüsusi rəmzi məna daşıyır. Direktorun sözlərinə görə, B.Vahabzadənin zəngin poetik irsi Azərbaycan ədəbiyyatının və bütöv Türk dünyasının mənəvi xəzinəsinin mühüm hissəsidir və ortaq dəyərlərin yaşadılmasına xidmət edir.
Konsert proqramı Azərbaycan Dövlət Akademik Opera və Balet Teatrının solistləri Orxan Cəlilov və Rəvanə Əmiraslanlının yüksək məharətlə təqdim etdikləri vokal ifalarla açılıb. Hər iki sənətçi Azərbaycan musiqisinin melodik dərinliyini, klassik vokal məktəbinin gücünü və səhnə mədəniyyətini auditoriyaya böyük ustalıqla çatdırıb.
Tədbirdə Azərbaycan Mədəniyyət Mərkəzinin “Xarıbülbül” teatr truppası da zəngin bir proqramla çıxış edib. Truppa Üzeyir Hacıbəylinin məşhur “Arşın mal alan” əsərinə müraciət edərək bu klassik operettanın müxtəlif məqamlarını səhnədə canlandırıb. Ardınca kollektivi “Qayınana” tamaşasına aid bir-birini tamamlayan müxtəlif məqamların bədii təqdimatı izləyicilərə təqdim olunub.
Konsertin proqramında Azərbaycan Mədəniyyət Mərkəzinin “Qarabağ zəfəri” rəqs ansamblı da maraqlı təqdimat verib.
Azərbaycan musiqisinin, teatrının və rəqs incəsənətinin təqdim edildiyi bu proqram Fərqanə ictimaiyyətində yüksək mədəni təəssürat yaradaraq “Azərbaycan sənət və ədəbiyyat günləri”nin ən parlaq bədii hadisələrindən birinə çevrilib.
