Azərbaycan Turizm və Menecment Universitetinin (ATMU) Sosial Menecment fakültəsinin Qida mühəndisliyi ixtisasında təhsil alan bir qrup tələbəsi biliklərini genişləndirmək məqsədilə Lənkəran şəhərinə təcrübi səfər edib
“Tehsil365” xəbər verir ki,kafedranın dosenti Çingiz Əliyev tərəfindən təşkil olunan səfərin məqsədi tələbələrin nəzəri bilikləri real istehsalat və texnoloji proseslərlə müqayisə etməsi, həmçinin sənaye müəssisələri və mədəni-tarixi obyektlərlə yaxından tanış olması idi.
Səfərin ilk dayanacağı Lənkəran Tarix-Diyarşünaslıq Muzeyi olub. Muzey əməkdaşları tələbələrə regionun tarixi inkişafı, qədim yaşayış tərzi, məişət əşyaları, habelə dövrə məxsus əmək və təsərrüfat alətləri barədə geniş məlumat veriblər. Xüsusilə, taxılın ənənəvi üsullarla üyüdülməsi, yerli istehsal alətlərinin quruluşu və onların inkişaf mərhələləri tələbələrin marağına səbəb olub.
Daha sonra qrup Heydər Əliyev Mərkəzini ziyarət edib. Burada Ümummilli Liderin həyat və siyasi fəaliyyəti, Azərbaycana xidmətlərini əks etdirən foto-sənədlər, illərə görə hazırlanmış tablolar və müxtəlif eksponatlar nümayiş etdirilir. Mərkəzdə qorunan rəmzi “yanan məşəl” kompozisiyası da tələbələrə təqdim edilərək onun mənəvi-simvolik anlamı izah olunub.
Səfərin ən praktik hissəsi "Citrus Village Lənkəran"da keçirilib. Mandarin, kivi və feyxoa bağlarını əhatə edən 16 hektarlıq ərazidə tələbələrə sitrus bitkilərinin becərilməsi, aqrotexniki qulluq qaydaları və məhsul yığımı barədə ətraflı məlumat verilib. Təsərrüfat sahibi kivi mürəbbəsinin istehsal prosesi haqqında da danışaraq meyvələrin çeşidlənməsi, yuyulması, emalı, termiki işlənməsi və sterilizasiya mərhələlərini real nümunələrlə nümayiş etdirib.