Ənənəvi sistem fərdi öyrənməyə əsaslanır. Yeni yanaşmada isə komandaların və şəbəkələrin birgə öyrənməsi önə çıxır. Ənənəvi model təşkilati sabitliyə söykənirdisə, müasir dövrdə artıq dəyişikliklərlə yanaşı, davamlılıq da əsas əhəmiyyət kəsb edir.
“Tehsil365” xəbər verir ki, bu fikirləri London Universitet Kollecinin dosenti Devid Qodfrey “Keyfiyyətin yüksəldilməsi: Təcrübələr və yeni yanaşmalar” konfransında çıxışı zamanı bildirib.
O deyib ki, əvvəllər uğursuzluq qorxulu olduğu üçün risk edilmirdi, halbuki bu gün təhsil innovasiyalarının düşündüyümüz qədər riskli olmadığı aydın görünür: “Ənənəvi planlaşdırma qısamüddətli hədəflərə yönəlirdi. İndi məqsəd təşkilati yenilənmə və davamlı inkişafdır. Bu, təkcə proses deyil, mədəniyyət dəyişikliyidir. Əvvəllər bilik ekspertlər tərəfindən ötürülürdüsə, indi bilik paylaşılır və şəbəkə daxilində sərbəst şəkildə yayılır”.