Azərbaycan Dövlət Aqrar Universitetində (ADAU) görkəmli kimyaçı-alim, akademik Yusif Heydər oğlu Məmmədəliyevin 120 illik yubileyi münasibətilə tədbir keçirilib.
“Tehsil365” xəbər verir ki, tədbir Dövlət Himninin səslənməsi və Vətənimizin ərazi bütövlüyü uğrunda canından keçmiş şəhidlərin xatirəsinin bir dəqiqəlik sükutla yad edilməsi ilə başlayıb.
Sonra akademik Yusif Məmmədəliyevin həyat və elmi fəaliyyəti barədə geniş məlumat verilib.
Universitetin rektoru Zəfər Qurbanov tədbirdə çıxış edərək akademik Yusif Məmmədəliyevin elmi irsinin Azərbaycan elminin inkişafında xüsusi yer tutduğunu vurğulayıb. Rektor bildirib ki, bu gün Azərbaycan alimləri neft kimyası, kimya texnologiyaları sahəsində dünya elminə töhfə verməyə davam edirlər. Zəfər Qurbanov, həmçinin ADAU-da həyata keçirilən elmi layihələr, müasir laboratoriya mühitinin formalaşdırılması və tələbələr üçün yaradılan imkanların böyük alimlərin elm yolunu davam etdirmək məqsədi daşıdığını qeyd edib.
Daha sonra Yusif Məmmədəliyevin həyat və fəaliyyətinə həsr olunan videoçarx nümayiş etdirilib.
AMEA-nın Gəncə bölməsinin sədri akademik Fuad Əliyev çıxışında alimin katalitik proseslər sahəsində elmi yeniliklərinin müasir kimya sənayesinin əsasını təşkil etdiyini bildirib.
ADAU-nun Kimya kafedrasının professoru Elman Mövsümov çıxışında akademikin kimya elminin inkişafındakı rolunu qeyd edib və onun tədqiqatlarının bu gün də aktuallığını vurğulayıb.
Kimya kafedrasının müdiri Ülviyyə Həsənova, kafedranın dosenti Vaqif Məmmədov, Gəncə Dövlət Universitetinin (GDU) kafedra müdiri Aynur Məmmədova və GDU-nun dosenti Samirə Mehdiyeva çıxışlarında akademikin müəllimlik fəaliyyəti, kadr hazırlığı və elmi məktəbin formalaşmasındakı xidmətlərini diqqətə çatdırıblar.
Aqronomluq fakültəsinin ekologiya ixtisasının II kurs tələbəsi Nərmin Camalova çıxışında görkəmli alimin gənclər üçün elm yolunda böyük örnək olduğunu bildirib.
Tədbir iştirakçıları böyük alimin zəngin elmi irsinin Azərbaycanın kimya elminin inkişafında əhəmiyyətli rol oynadığını qeyd edərək, yubiley tədbirinin yüksək səviyyədə təşkilinə görə ADAU rəhbərliyinə təşəkkürlərini bildiriblər.
