AMEA A.A. Bakıxanov adına Tarix və Etnologiya İnstitutunda Azərbaycan Xalq Cümhuriyyətinin qurucularından biri, görkəmli dövlət xadimi Fətəli xan Xoyskinin anadan olmasının 150 illik yubileyinə həsr edilmiş “Azərbaycanın dövlətçilik tarixində Fətəli xan Xoyskinin yeri və rolu” mövzusunda respublika elmi konfransı keçirilib.
“Tehsil365” xəbər verir ki, tədbirdə elmi işlər üzrə direktor müavini tarix elmlər doktoru, dosent İlqar Niftəliyev Azərbaycan dövlətçilik tarixində Fətəli xan Xoyskinin müstəsna xidmətlərindən, siyasi fəaliyyətinin milli dövlət quruculuğunda oynadığı roldan bəhs edib. İlqar Niftəliyev bildirib ki, Xoyski şəxsiyyəti, fəaliyyəti və ideyaları müasir dövrdə də aktual olaraq elmi tədqiqatların diqqət mərkəzindədir.
Konfransda professor Hacı Həsənov “Fətəli xan Xoyskinin nəsil şəcərəsi haqqında”, professor Qasım Hacıyev “Fətəli xan Xoyski Cənubi Qafqazın siyasi həyatında”, dosent Şamil Rəhmanzadə “Fətəli xan Xoyski Azərbaycan xalqının təzadlı tarixi şəxsiyyəti: Təlatümlərlə, ziddiyyətlərlə və tərəddüdlərlə dolu siyasi həyat”, dosent Mübariz Ağalarlı “Fətəli xan Xoyskinin siyasi görüşləri və dövlətçilik fəlsəfəsi”, dosent Natiq Məmmədzadə “Cümhuriyyətin iqtisadi siyasətinin təşəkkülündə Fətəli xan Xoyskinin rolu” mövzularında məruzə ilə çıxış ediblər. Həmçinin dosent Nailə Hüseynovanın “Fətəli xan Xoyski və Azərbaycanın müstəqilliyi”, dosent Pərvin Ahənçinin “Fətəli xan Xoyski və Cənubi Qafqazda müsəlman ilahiyyat irsinin mühafizəsi (XIX əsrin sonu – XX əsrin əvvəli)”, tarix üzrə fəlsəfə doktoru Fəxri Hacıyevin “Fətəli xan Xoyskinin siyasi-diplomatik fəaliyyəti: Gürcüstanla ikitərəfli münasibətlər və problemli məsələlər kontekstində” məruzələri dinlənilib. Məruzələrdə Fətəli xan Xoyskinin siyasi-diplomatik fəaliyyəti, dövlət quruculuğu sahəsində xidmətləri, Cümhuriyyət dövrünün ictimai-siyasi və iqtisadi proseslərində rolu geniş şəkildə təhlil olunub. Konfransda çıxış edən alimlər Fətəli xan Xoyskinin Azərbaycan dövlətçilik tarixində mühüm yer tutduğunu, onun irsinin bu gün də dəyərini qoruduğunu vurğulayıblar.
