09 dekabr 2025-ci il tarixində Astara Şəhər Kitabxana Filialı tərəfindən Azərbaycan xalq şairi Osman Sarıvəllinin anadan olmasının 120 illiyi münasibətilə Astara şəhər 1 nömrəli tam orta məktəbində tədbir keçirilib.
“Tehsil365” xəbər verir ki, Tədbirdə çıxış edən kitabxana filialının müdiri Aysel Əkbərova şairin həyat və yaradıcılığı barədə şagirdlərə ətraflı məlumat verib. O qeyd edib ki, Osman Sarıvəlli 1905-ci il dekabrın 17-də Qazax rayonunun İkinci Şıxlı (Sarıvəlli) kəndində dünyaya göz açıb. O, ilk təhsilini Qazax Müəllimlər Seminariyasında almış, daha sonra müəllim kimi Göyçay rayonunun kənd məktəblərində fəaliyyət göstərmişdir.
Şairin təhsilə və ədəbiyyata olan marağı onu Moskvaya aparmış, burada Dövlət Universitetinin filologiya fakültəsində təhsilini davam etdirmişdir. Əmək fəaliyyətinə Bakı Pedaqoji texnikumunda başlayan Osman Sarıvəlli müxtəlif illərdə müxtəlif məsul vəzifələrdə çalışmış, o cümlədən “Ədəbiyyat qəzeti”nin redaktoru, Yazıçılar İttifaqında şeir üzrə məsləhətçi vəzifələrini icra etmişdir.
Ədəbi yaradıcılığa 1933-cü ildə başlayan şairin ilk şeiri "Ayaqsız" adı ilə “Gənc işçi” qəzetində çap olunub. İlk şeirlər kitabı isə 1934-cü ildə “Dəmir sətirlərim” adı ilə nəşr edilib.
Tədbir zamanı şagirdlər şairin şeirlərindən parçalar səsləndirib, onun həyat yoluna dair təqdimatlarla çıxış ediblər. Tədbir iştirakçıları Osman Sarıvəllinin Azərbaycan ədəbiyyatında tutduğu mövqeyin yüksək qiymətləndirildiyini vurğulayıblar.