Dekabrın 9-da Slovakiya Prezidenti Peter Pelleqrini Azərbaycan Prezidenti İlham Əliyevi və onu müşayiət edən nümayəndə heyətini Bratislava qəsrində yüksək səviyyədə qarşıladı.
“Tehsil365” xəbər verir ki, Görüş zamanı Prezident Pelleqrini iki ölkə arasında dostluq münasibətlərinə və ortaq dəyərlərə toxunaraq səmimi və dərin məzmunlu çıxış edib.
Prezident Pelleqrini qeyd edib ki, Azərbaycanın zəngin tarixi, mədəniyyəti və xalqının qonaqpərvərliyi Slovakiya üçün hər zaman maraq və rəğbətlə qarşılanıb. O, Azərbaycanın təkcə Abşerondakı əbədi alovla deyil, xalqının mətanəti, qətiyyəti və mehribanlığı ilə yadda qaldığını bildirib. Qobustandakı qədim qayaüstü təsvirləri və Azərbaycanın musiqi irsi də Prezidentin çıxışında xüsusi vurğulanıb.
“Coğrafi məsafəyə baxmayaraq, xalqlarımız bir-birinə düşündüyümüzdən daha yaxındır,” – deyə Pelleqrini vurğulayıb. O, Azərbaycanın sivilizasiyaların qovuşağında yerləşərək tarix boyu xalqları birləşdirdiyini, Slovakiyanın isə bu gün Şərqlə Qərb arasında körpü rolunu oynadığını qeyd edib.
Slovakiya Prezidenti ölkəsinin beynəlxalq hüquqa, sülhə və diplomatiyaya sadiq olduğunu bildirib, ölkəsinin dostluq və əməkdaşlığa daim açıq olduğunu diqqətə çatdırıb. O, Prezident İlham Əliyevin rəhbərliyi ilə Azərbaycanın gələcəyə inamla addımladığını və bu yolda Slovakiyanın Azərbaycanın yanında olduğunu bildirib.