Azərbaycan Dillər Universitetinin (ADU) Azərbaycan ədəbiyyatı kafedrasının təşkilatçılığı ilə Bakı Dövlət Universitetinin Azərbaycan ədəbiyyatı kafedrasının dosenti, filologiya üzrə fəlsəfə doktoru Məti Osmanoğlunun “Bodenştedt oğrudurmu, doğrudurmu?” kitabının təqdimatı və müzakirəsi keçirilib.
“Tehsil365” bildirir ki, tədbiri Azərbaycan ədəbiyyatı kafedrasının müdiri, akademik Muxtar İmanov açaraq tədbirin əhəmiyyətindən danışıb, Məti Osmanoğlunun apardığı araşdırmanın ədəbiyyat tariximizin az öyrənilmiş sahələrinə işıq saldığını qeyd edib. Akademik vurğulayıb ki, tədqiqat yalnız bir şəxsiyyətin fəaliyyətinə deyil, bütövlükdə mədəniyyətlərarası əlaqələrin təhlilinə yeni baxış sərgiləyir. O, həmçinin Bodenştedtin Azərbaycan mədəni irsinə münasibətinin müxtəlif dövrlərdə fərqli şəkildə təqdim olunmasının səbəblərinə toxunaraq, bu mövzunun gənc tədqiqatçılar üçün geniş araşdırma imkanları yaratdığını bildirib.
Məti Osmanoğlu görüşdə Bodenştedtin naməlum tərəflərinə toxunub, həmçinin Azərbaycan–Alman ədəbi əlaqələri tarixində az tədqiq olunan məqamları diqqət mərkəzinə çəkib. O bildirib ki, Azərbaycan xalqının tarixi və mədəniyyəti haqqında Avropa oxucusunda dolğun təsəvvür yaradan, həmçinin Mirzə Şəfi barədə maraqlı və dürüst məlumatlar verən Bodenştedti ədəbiyyat oğrusu adlandırmaq obyektivlikdən uzaq bir yanaşmadır.
Azərbaycan ədəbiyyatı kafedrasının müəllimi, filologiya elmləri doktoru Aytən Hacıyeva müzakirəyə qoşularaq mövzu ilə bağlı maraqlı suallarını müəllifə ünvanlayıb, tədqiqatın metodoloji əsasları, istifadə edilən mənbələrin müqayisəli təhlili və Bodenştedtin şəxsi yaradıcılığı ilə ictimai mövqeyi arasındakı əlaqələr barədə fikir mübadiləsi aparıb. O, həmçinin tədqiqatın gələcəkdə daha böyük layihələrə yol aça biləcəyini, tələbələr üçün isə geniş elmi istiqamət yaratdığını qeyd edib.
Azərbaycan ədəbiyyatı kafedrasının baş müəllimi Heyran Amanova çıxış edərək tədqiqatın elmi yeniliyini yüksək qiymətləndirib, əsərdə diqqət çəkən faktlar, yeni arxiv mənbələri və müəllifin yanaşma xüsusiyyətləri barədə fikirlərini dinləyicilərlə bölüşüb.
Tədbirin sonunda auditoriya tərəfindən səsləndirilən suallar ətrafında geniş müzakirə aparılıb, Məti Osmanoğlu Bodenştedtin həyat yolu və yaradıcılığı ilə bağlı müxtəlif məqamları daha detallı şəkildə izah edib.