Azərbaycan Universitetinin Keyfiyyət təminatı şöbəsinin nəzdində təsis edilən “Keyfiyyət elçiləri” klubunun ilk iclası keçirilib. İclasda klubun əsasnaməsinin və fəaliyyət planının layihəsi müzakirə olunub və iclasın gündəliyində olan məsələlərə dair fikir mübadiləsi aparılıb.
“Tehsil365” bildirir ki, maraqlı və məhsuldar müzakirələr əsasən tədrisin interaktiv və tələbəyönümlü formatda təşkili; müəllim-tələbə münasibətlərində keyfiyyətə əsaslanan yanaşmanın tətbiqi; tələbələrin əmək bazarına uyğun bacarıqlarının inkişafı; universitetdə davamlı inkişaf mədəniyyətinin gücləndirilməsi; müxtəlif mövzularda anonim sorğuların təşkili və nəticələrin təhlili; universitetdə fəaliyyət göstərən digər tələbə klubları və təşkilatlarla əməkdaşlıq layihələrinin həyata keçirilməsi; müəllimlərin tədris metodikasına dair tələbə rəylərinin toplanması və təhlili; tələbələrlə universitet rəhbərliyi arasında effektiv kommunikasiya körpüsünün qurulması və bu kimi mövzuları əhatə edib.
İclasda Keyfiyyət təminatı şöbəsinin müdiri Lalə Abasova və şöbənin əməkdaşları klub üzvlərinin fikirlərini dinləyib, onların rəy və təşəbbüslərinin fəaliyyət planının hazırlanmasında nəzərə alınacağını bildiriblər. İclasda klub üzvlərinin universitetdə keyfiyyətli, şəffaf və tələbəmərkəzli təhsil mühitinin formalaşmasına töhfə verə biləcəkləri vurğulanıb və bu məqsədlə klub üzvləri üçün təlimlərin təşkilinin nəzərdə tutulduğu qeyd olunub.
İclasın sonunda klubun əsasnaməsi və rəsmi loqosu təsdiqlənib və rəsmi fəaliyyətə start verilib.
Qeyd edək ki, klubun yaradılmasında əsas məqsəd tələbələrin ali təhsildə keyfiyyət mədəniyyətinin formalaşmasında fəal iştirakını, onların baxış və təşəbbüslərinin universitetin inkişaf strategiyasına inteqrasiyasını təmin etməkdir.