Şəmsiyyə Alışanova Qəbələ Dövlət Peşə Təhsil Mərkəzində təhsil alır. Azərbaycan Dövlət Pedaqoji Universitetinin məzunudur. “Tarix müəllimliyi” ixtisası üzrə təhsilini başa vurduqdan sonra turizm zonası olan Qəbələdə zamanın tələbinə cavab verən bir ixtisasa yiyələnməyi düşünüb.
“Tehsil365” “Qafqazinfo”-ya istinadən xəbər verir ki, o bu barədə “Azərbaycan müəllimi”nə danışıb.
Ş.Alışanova qeyd edib ki, Qəbələ Dövlət Peşə Təhsil Mərkəzində təşkil edilən təhsil sərgilərində iştirak edərkən maarifləndirici ekoturizm layihələri ilə tanış olub:
“Bu imkanı özüm üçün bir şans saydım və “Turizm təşkilatçılığı” ixtisası üzrə ikinci təhsil almağa qərar verdim. Hazırda təhsilim uğurla davam edir. 1 illik dual təhsil alıram. Attestat qiymətlərim yüksək olduğu üçün təhsil müəssisəsində əlaçı təqaüdü ilə oxuyuram”.
O, Qəbələ Dövlət Peşə Təhsil Mərkəzinin tələbələri üçün şans sayıla biləcək geniş imkanlar olduğunu deyib: “Məsələn, mərkəzin tərəfdaşları yüksək standartlara cavab verən nüfuzlu şirkətlər olduğundan təcrübəçi tələbələr geniş karyera imkanları ilə yanaşı, üstün bacarıqlar əldə edirlər. Burada aldığmız təhsil sayəsində artıq ingilis dilində öz fikirlərimi sərbəst formada ifadə edirəm. Təcrübə proqramı çərçivəsində yüksək standartlı turizm müəssisələrində ingilis dilində danışmalı olur, istər-istəməz dil biliklərimizi yaxşılaşdırırıq. Bu minvalla nəinki ingilis dilində səviyyəmi inkişaf etdirmişəm, hətta ərəbcə də öyrənməyə başlamışam. Təcrübə müddətində rayonumuza gələn çoxsayılı ərəb turistlərlə danışır, danışa-danışa ərəbcə öyrənirəm. Hazırda həmin dildə fikirlərimi ifadə edə bilirəm”.
Şəmsiyyənin anası da Qəbələ Dövlət Peşə Təhsil Mərkəzinin məzunudur. Sənubər Alışanova 2024-cü ildə “Heyvandarlıq” ixtisası üzrə keçmiş məcburi köçkünlər üçün təşkil olunan qısamüddətli kurslarda iştirak edib.
Ailənin daha bir üzvü - Sənubər Alışanovanın oğlu Nurlan da hazırda Qəbələ Dövlət Peşə Təhsil Mərkəzinin “Turizm sahəsində iaşə üzrə mütəxəssis” ixtisasının tələbəsidir.1 illik dual qrupda dövlət hesabına təhsil alan Nurlan Alışanov Qarabağın terrorçulardan təmizlənməsi prosesinin fəal iştirakçılarındandır.
Bir vaxtlar Kəlbəcərdən məcburi köçkün olan ailənin gələcək planları məhz Kəlbəcəryönümlüdür. Kəlbəcərə qayıtmaq üçün orada ən çox ehtiyac hiss edilən peşələri seçir, onlara lazım olacaq bacarıqlar əldə edirlər. 52 yaşında təhsil almaq üçün Qəbələ Dövlət Peşə Təhsil Mərkəzinə üz tutan Sənubər Alışanova da, ali təhsilli qızı Şəmsiyyə və qəhrəman oğlu Nurlan da peşə təhsilinin əhəmiyyətini bilirlər.
Bir peşə təhsili müəssisəsi olaraq fəaliyyətində böyük nailiyyətlər əldə edən Qəbələ Dövlət Peşə Təhsil Mərkəzi isə, sadəcə Alışanovlar ailəsinin deyil, 30-dan çox ailənin şans sayaraq etdiyi həyati seçimdir