Şəki şəhər Heydər Əliyev Mərkəzində AMEA-nın Şəki Regional Elmi Mərkəzi (REM) tərəfindən Ümummilli Lider Heydər Əliyevin anım günü münasibətilə “Heydər Əliyev elmin keşiyində” mövzusunda tədbir keçirib.
Bu barədə “Tehsil365"ə AMEA-dan məlumat verilib.
Əvvəlcə Ulu Öndərin həyat və ictimai-siyasi fəaliyyətini əks etdirən sərgi ilə tanışlıq olub. Daha sonra dahi lider Heydər Əliyevin və şəhidlərimizin xatirəsi bir dəqiqəlik sükutla yad edilib.
Tədbirdə Şəki REM-in Tarix və epiqrafika şöbəsinin elmi işçisi Elçin Vəliyev məruzə ilə çıxış edərək, Ulu Öndər Heydər Əliyevin zəngin həyat yolu, Azərbaycana rəhbərlik etdiyi dövrlərdə ölkənin inkişafına verdiyi mühüm töhfələr haqqında danışıb. O, Heydər Əliyevin dövlət idarəçiliyi sahəsində həyata keçirdiyi islahatları, milli dövlətçiliyin möhkəmlənməsinə yönəlmiş addımlarını və müasir Azərbaycanın formalaşmasındakı tarixi rolunu xüsusi qeyd edib.
Məruzədə Ümummilli Liderin siyasi kursunun Prezident İlham Əliyev tərəfindən ardıcıl və uğurla davam etdirildiyi vurğulanıb. Qeyd olunub ki, 2020-ci ildə qazanılmış şanlı Zəfərin əsasında Ulu Öndərin müəyyənləşdirdiyi strateji xətt, ölkənin hərbi, siyasi və iqtisadi qüdrətinin möhkəmləndirilməsi istiqamətində atdığı addımlar dayanıb.
Şəki REM-in Ədəbi-mədəni mühit və folklor şöbəsinin müdiri İradə Yusifova çıxışında Ümummilli Lider Heydər Əliyevin elmə və mədəniyyətə göstərdiyi yüksək diqqət və qayğıdan bəhs edib. O, Ulu Öndərin Azərbaycanda elmi potensialın gücləndirilməsi, mədəni irsin qorunması və ədəbi mühitin inkişafı istiqamətində həyata keçirdiyi mühüm layihələri xatırladıb, bu siyasətin hazırda uğurla və qətiyyətlə davam etdirildiyini diqqətə çatdırıb.
Sonda Ulu Öndər Heydər Əliyevə həsr olunmuş sənədli film nümayiş etdirilib.
