Azərbaycan Milli Elmlər Akademiyasının (AMEA) Rəyasət Heyətinin növbəti iclası keçirilib.
Bu barədə “Tehsil365"ə AMEA-dan məlumat verilib.
İclası AMEA-nın rəhbəri akademik İsa Həbibbəyli açaraq tədbirin gündəliyi barədə məlumat verib.
İclasda müzakirəyə çıxarılan ilk məsələ 2025-ci il üçün AMEA-da fəlsəfə doktoru hazırlığı üzrə doktoranturaya qəbul edilmiş doktorantların dissertasiya mövzusu və elmi rəhbərlərinin təsdiq olunması haqqında olub.
Rəyasət Heyətinin qərarı ilə 2025-ci il üçün AMEA-da fəlsəfə doktoru hazırlığı üzrə doktoranturaya qəbul edilmiş doktorantların dissertasiya mövzusu və elmi rəhbərləri təsdiqlənib.
İclasda, həmçinin AMEA-nın 80 illik yubiley tədbirləri çərçivəsində elan olunmuş “Humanitar və ictimai elmlər sahəsində süni intellekt və rəqəmsal texnologiyalardan istifadə imkanları” mövzusunda gənc tədqiqatçıların müsabiqəsinin nəticələri elan edilib.
Akademik İsa Həbibbəyli bildirib ki, qərarın qəbul edilməsində əsas məqsəd gənc alimlərin yaradıcılıq potensialının üzə çıxarılması, süni intellekt və rəqəmsal texnologiyaların humanitar və ictimai elmlərə tətbiqinin təşviqi, eləcə də elmi fəaliyyətin müasir çağırışlara uyğun inkişafının təmin edilməsidir.
Sonra Elm və təhsil şöbəsinin müdiri filologiya elmləri doktoru Sərxan Xavəri nəticələri təqdim edib. Diqqətə çatdırıb ki, Rəyasət Heyətinin Qərarına əsasən müsabiqənin təşkili məqsədilə komissiya yaradılıb, müsabiqənin keçirilməsi barədə AMEA-nın rəsmi internet səhifəsində müvafiq elan yerləşdirilib. Daxil olmuş məqalələr komissiya tərəfindən müəyyən edilmiş meyarlar əsasında qiymətləndirilib və müsabiqənin nəticələri yekunlaşdırılıb.
Müsabiqəsinin nəticələrinə əsasən, AMEA-nın Memarlıq və İncəsənət İnstitutunun əməkdaşı Ləman Rüstəmli I yeri tutub. AMEA-nın Nizami Gəncəvi adına Ədəbiyyat İnstitutunun əməkdaşı Orxan İsayev və AMEA-nın akademik Ziya Bünyadov adına Şərqşünaslıq İnstitutunun əməkdaşı Röya Mirzəbəyova II yer, AMEA-nın Fəlsəfə və Sosiologiya İnstitutunun əməkdaşı Cahandar Cabarov, AMEA-nın Gəncə bölməsinin əməkdaşı İlahə Əsədzadə və AMEA-nın Naxçıvan Bölməsinin əməkdaşı Rüzgar Camal III yeri tutublar. Həmçinin 13 nəfər həvəsləndirici mükafata layiq görülüb.
Rəyasət Heyətinin qərarı ilə müsabiqə qalibləri pul mükafatı və diplomla təltif ediliblər.
Tədbirdə AMEA-nın Fəlsəfə və Sosiologiya İnstitutunun Sosiologiya şöbəsinin bazasında daxili imkanlar və mövcud ştat vahidləri hesabına Rəqəmsal sosiologiya və sosioloji tədqiqatlar şöbəsinin yaradılması haqqında qərar qəbul olunub.
Həmçinin AMEA-nın müxbir üzvü Elşad Qurbanovun 75 illik yubileyi haqqında qərar qəbul edilib.
İclasda qeyd olunan məsələlər ətrafında akademik Rasim Əliquliyev, professor İlham Məmmədzadə, filologiya elmləri doktoru Hikmət Quliyev, filologiya üzrə fəlsəfə doktoru Səbuhi Qəhrəmanov və başqaları çıxış edərək fikir və təkliflərini səsləndiriblər.
