10 noyabr tarixində Azərbaycan Dillər Universitetinin İngilis-alman dili fakültəsi nəzdində İngilis dilinin leksikologiyası kafedrasının baş müəllimi, fil.f.d. Nigar Bağırovanın təşkilatçılığı ilə Qrup 202A tələbələrinin iştirakı ilə “Zəfərə mübarək” adlı ədəbi-bədii tədbir keçirilib. Tədbirdə İngilis və alman dilləri fakültəsinin dekanı, fil.f.d., dos. Naibə Camalzadə, İngilis və fransız dilləri fakültəsinin dekanı, fil.f.d., dos. Vəfa Babayeva, İngilis dilinin leksikologiyası kafedrasının müdiri, fil.f.d., dos. Mehriban Hüseynova, Oxu zalının müdiri Güllüzar Məmmədova və kafedra əməkdaşları iştirak edib.
“Tehsil365” bildirir ki, tədbir ilk olaraq Vətən uğrunda canlarını fəda etmiş şəhidlərimizin xatirəsi bir dəqiqəlik sükutla yad edilməklə başlayıb. Ardınca ümummilli lider Heydər Əliyevin çıxışından seçilmiş görüntülər təqdim olunub və tədbirə xüsusi siyasi-mənəvi məzmun qatıla bilib. Ulu Öndərin dövlətçilik düşüncəsi və milli ideologiyanın əsaslarını əks etdirən nitq fraqmentləri tələbələr tərəfindən böyük diqqətlə izlənilib.
Tədbirdə Prezident İlham Əliyevin rəhbərliyi və qətiyyətli siyasəti nəticəsində Azərbaycanın işğaldan azad olunmuş torpaqlarında bərpa edilən ədalətdən bəhs edilib. Tələbələr tərəfindən nümayiş etdirilən səhnəciklərdə Müzəffər Ali Baş Komandanın öz xalqına güvənən, xalqın iradəsinə arxalanan lider kimi tarixi Qələbəyə imza atması göstərilib. Əsgərlərimizin şücaəti, birlik və vətənpərvərlik ruhu xüsusi vurğulanıb.
Proqram çərçivəsində tələbələr “Ana vətən” kompozisiyası, Qarabağ rayonlarını təcəssüm etdirən ana obrazı və müxtəlif bədii səhnələrlə tamaşaçılara emosional anlar yaşadıb. Şeir nümunələri və vətənpərvərlik motivli çıxışlar tədbirin estetik dəyərini artırıb. Sonda tələbələrin canlı ifasında səsləndirilən Azərbaycan mahnısı tədbirə xüsusi ruh yüksəkliyi qatıb və möhtəşəm yekun yaradıb.