Dekabrın 11-də Azərbaycan Dillər Universitetində Ulu öndər Heydər Əliyevin anım gününə həsr olunmuş tədbir keçirilib.
“Tehsil365” bildirir ki, tədbirdə universitetin professor-müəllim heyəti, tələbələr iştirak ediblər.
Ümummilli lider Heydər Əliyevin əziz xatirəsi bir dəqiqəlik sükutla yad edilib.
ADU-nun rektoru, akademik Kamal Abdulla Ulu öndərin Azərbaycan xalqına olan sevgisindən, misilsiz tarixi xidmətlərindən danışıb.
Bildirilib ki, ölkəmizdə qazanılan bütün nailiyyətlər dahi rəhbər Heydər Əliyev siyasətinin bəhrəsidir:
“Gənc nəsil bilməlidir ki, Ulu öndər Heydər Əliyev Azərbaycanda hakimiyyətə gəlməsəydi, bugünkü Azərbaycan olmayacaqdı.
Ulu Öndər Heydər Əliyev müstəqil Azərbaycan dövlətinin ən ağır dönəmində həyatını riskə qoyaraq xalqımız və ölkəmiz üçün çox böyük işlər görməyi bacardı. Müstəqilliyin ilk illərində parçalanmaq və dünya xəritəsindən silinmək təhlükəsi ilə üz-üzə qalmış Azərbaycanı bu fəlakətdən Heydər Əliyevin müdrik siyasəti, xalqa olan sevgisi və inamı, böyük zəhməti və təcrübəsi xilas etdi.
Ölkədə ictimai-siyasi sabitlik bərqərar edildi, Azərbaycan regionun ən etibarlı və güclü dövlətlərindən biri kimi özünü dünyaya təqdim etməyə müvəffəq oldu.
Sovet imperiyası 1990-cı il yanvarın 19-dan 20-nə keçə gecə Azərbaycan xalqının azadlıq, müstəqillik arzularını boğmaq üçün Bakıda dəhşətli qırğın törətdi.
Həmin çətin günlərdə Vətəndən uzaqlarda olsa belə, öz millətinin, xalqının taleyinə biganə qala bilməyən ümummilli liderimiz Heydər Əliyev həyatını təhlükə qarşısında qoyaraq yenə xalqının harayına səs verdi.
Ulu Öndər yanvarın 21-də Azərbaycanın Moskvadakı Daimi Nümayəndəliyində mətbuat konfransı keçirərək əliyalın xalqa qarşı törədilən terroru hüquqa, demokratiyaya, insanlığa zidd aksiya kimi pisləyərək sovet rəhbərliyinin cinayətkar əməllərini ifşa etdi.
Allah Ulu öndərə rəhmət eləsin, qəbri nurla dolsun, biz onu heç vaxt unutmayacağıq”.
Daha sonra tələbələr Ulu Öndərə həsr olunan şeirlər söyləyib, mahnılar ifa edib, ədəbi-bədii kompozisiyalar nümayiş etdiriblər.