Müasir dövrdə psixoloji sağlamlıq mövzusu cəmiyyət üçün getdikcə daha aktual hal alır.
"Tehsil365" xəbər verir ki, Texnologiyanın sürətlə inkişaf etdiyi bir zamanda insanların emosional yükü artır, psixoloji dəstəyə ehtiyac daha çox hiss olunur. Bu mövzu ətrafında Amerikan Psixoloqlar Assosiasiyasının üzvü, klinik psixoloq Fəridə Musavi ilə həmsöhbət olduq.
– Psixologiya sahəsini seçməyinizə səbəb nə oldu?
“Ümumiyyətlə, hər şey bu həyatda enerjidir. Heç nə səbəbsiz baş vermir. Hər kəs bu həyata bir missiya ilə gəlir. Mən düşünürəm ki, mənim missiyam insanların ruhuna toxunmaqdır. Bu sahədə özümü uğurlu hesab edirəm. Pasiyentlərimin geri dönüşləri də bunu təsdiqləyir.”
– Son illərdə psixoloqlara müraciət sayı artıb. Sizcə səbəb nədir?
Psixoloqun fikrincə, bunun əsas səbəbi texnologiyanın yanlış istifadəsidir:
“Müasir dövr texnologiya dövrüdür. İnsanlar hər şeyi doğru şəkildə istifadə edə bilmədikdə öz psixologiyalarına ziyan vururlar. Hisslərini basdırırlar, emosiyalarını düzgün idarə etmirlər və nəticədə psixoloji gərginlik artır.”
– Ən çox rast gəldiyiniz psixoloji problemlər hansılardır?
“Basdırılmış duyğular, panik ataklar və depressiya – bu gün ən geniş yayılmış psixoloji problemlərdir,” – deyə Fəridə Musavi bildirir.
– Valideynlər uşaqlarda psixoloji problemləri necə tanıya bilər?
Psixoloq hesab edir ki, ilk addım uşağı yaxşı tanımaqdır:
“Hər bir valideyn uşağının davranışlarını, bədən dilini yaxşı bilməlidir. Fərqli və qeyri-adi davranışlar müşahidə edildikdə artıq diqqətli olmaq lazımdır. Əgər valideyn uşağını yaxşı tanımırsa və vəziyyəti qiymətləndirməkdə çətinlik çəkirsə, mütləq psixoloqa müraciət etməlidir.”
– Sosial medianın yeniyetmələrin psixikasına təsiri barədə nə düşünürsünüz?
“Sosial media həm yeniyetmələrin, həm də böyüklərin psixologiyasına təsir edir. Orada gördüklərini həyatlarına və beyinlərinə transfer edirlər. Buna görə sosial mediadan düzgün istifadə çox vacibdir.”