Keniyada keçirilən BMT-nin Ətraf Mühit Assambleyasının 7-ci sessiyasında (UNEA7) Azərbaycan Respublikasının Milli Bəyanatı təqdim edilib.
“Tehsil365“ “AZƏRTAC”a istinadla xəbər verir ki, tədbirdə Bəyanatı Azərbaycanın ekologiya və təbii sərvətlər nazirinin müavini Umayra Tağıyeva səsləndirib.
Nazir müavini çıxışında bildirib ki, iqlim dəyişikliyi, ətraf mühitin deqradasiyası və çirklənmənin təsirləri bütün regionlarda hiss olunur və Azərbaycan da istisna deyil. “Ölkəyə daxil olan su ehtiyatlarında 30 faiz azalma müşahidə edirik, ekosistemlərimiz daha böyük təzyiqlərlə üzləşir və dünyanın ən böyük qapalı su hövzəsi olan Xəzər dənizi sürətlə kiçilir. Bu çağırışlar Azərbaycanın milli ekoloji və iqlim gündəmini formalaşdırmağa davam edir”, - deyə nazir müavini bildirib.
Umayra Tağıyeva çıxışında Azərbaycanın COP29-a ev sahibliyinin nəticələrinə toxunub. “Ötən il Azərbaycan Respublikasının Prezidenti İlham Əliyevin rəhbərliyi altında COP29-a ev sahibliyi etmək şərəfinə nail olduq. COP29 qəbul olunmuş mandatların icrasını təmin etdi və qlobal iqlim ambisiyasını gücləndirdi. İqlim maliyyəsi üzrə Yeni Kollektiv Kəmiyyət Hədəfi haqqında əldə olunmuş razılaşma inkişaf etməkdə olan ölkələrin öz milli iqlim planlarını həyata keçirməsinə imkan yaradan dönüş nöqtəsi oldu. Bütün bunlara görə Bakıda verilmiş öhdəliyin tərəddüdsüz və gecikmədən yerinə yetirilməsi olduqca vacibdir. COP29-da qəbul olunmuş digər qərarlar, o cümlədən Paris Sazişi üzrə karbon bazarlarını tənzimləyən qaydaların yekunlaşdırılması Sazişin siyasətini tam şəkildə aktivləşdirdi. Bu isə Paris Sazişinin ikinci onilliyində daha mənalı və real icraya keçid üçün möhkəm bir təməl yaratdı.
Milli səviyyədə Azərbaycan iqlim fəaliyyəti və ekoloji siyasətdə nümunədir. Biz Paris Sazişi çərçivəsində öhdəliklərimizi təsdiqləyərək yenilənmiş “Milli Töhfələrə Dəyişikliklər 3.0” (NDC 3.0) təqdim etmişik. Yeni hədəfimiz emissiyaları 2035-ci ilə qədər 40 faiz azaltmaqdır. Bu, əvvəlki 2050-ci il hədəfimizi 15 il qabağa çəkməklə cəmi iki il ərzində ambisiyanın əhəmiyyətli dərəcədə artırıldığını göstərir. Bu qərar 2023-cü ilin sonunda təqdim etdiyimiz yenilənmiş NDC 2.0-dən sonra atılmış növbəti mühüm addımdır.
Eyni zamanda, Kiqali Dəyişiklik Protokoluna və Rotterdam Konvensiyasına qoşulmaqla ekoloji öhdəliklərimizi daha da gücləndirmişik. Bu addımlar Azərbaycanın təhlükəli maddələrlə mübarizə, hava keyfiyyəti və iqlim dəyişmələrinin azaldılması sahəsində qlobal səylərə uyğunlaşmaq əzmini nümayiş etdirir.
Ekosistemlərin bərpası, biomüxtəlifliyin mühafizəsi, iqlimədavamlı icmaların qurulması və dayanıqlı ekosistemlərin inkişaf etdirilməsi istiqamətində ölkə üzrə işlər davam edir. Bu kontekstdə “yaşıl inkişaf” 2027–2030-cu illər üçün Sosial-İqtisadi İnkişaf Strategiyasının əsas prioritetlərindən biri olaraq qalır”, - deyə nazir müavini əlavə edib.
Nazir müavini bildirib ki, gələn il Azərbaycan BMT-nin Məskunlaşma Proqramı (UN-Habitat) ilə birgə Dünya Şəhərsalma Forumuna (WUF13), BMT-nin Ətraf Mühit Proqramı (UNEP) ilə isə Dünya Ətraf Mühit Gününə (WED2026) ev sahibliyi edəcək. O, bütün tərəfdaşları bu mühüm tədbirlərdə iştirak etmək üçün Bakıya dəvət edib.