Bakı Dövlət Universiteti (BDU) Ümummilli Lider Heydər Əliyevin xatirəsinə həsr olunmuş paylaşım edərək onun həyat və fəaliyyətinin Azərbaycan dövlətçiliyində oynadığı müstəsna rolu bir daha diqqətə çatdırıb.
“Tehsil365” in məlumatına əsasən, paylaşımda vurğulanıb ki, Heydər Əliyev xalqımızın milli azadlıq və müstəqillik tarixində xilaskar missiyasını yerinə yetirmiş, Azərbaycan dövlətinin qurucusu və müasir inkişafının memarı kimi əbədiyaşar şəxsiyyətə çevrilmişdir. Ulu Öndərin “Mən həyatımın mənasını xalqıma xidmətdə görürəm. Azərbaycan mənim həyatımın mənasıdır” fikri onun bütün fəaliyyətinin mahiyyətini ifadə edir.
BDU-nun məlumatında qeyd olunur ki, Heydər Əliyevin ölkəyə rəhbərlik etdiyi dövrlər – 1969–1982-ci illər və 1993–2003-cü illər Azərbaycan tarixində həm quruculuq, həm də inkişaf salnaməsinin ən parlaq mərhələlərini təşkil edib. Onun siyasi iradəsi və uzaqgörənliyi nəticəsində dövlətçilik ənənələri möhkəmlənib, müstəqil Azərbaycan qlobal arenada layiqli mövqe qazanıb.
Vurğulanıb ki, Ulu Öndərin müəyyənləşdirdiyi siyasi xətt bu gün Prezident İlham Əliyev tərəfindən uğurla davam etdirilir. Məhz bu ardıcıl siyasət nəticəsində Azərbaycan regionun güc mərkəzinə çevrilib, ölkənin ərazi bütövlüyü bərpa olunub və Azərbaycan bayrağı Şuşa, Xankəndi, Xocalı da daxil olmaqla bütün əzəli torpaqlarımızda dalğalanır.
BDU bildirir ki, Heydər Əliyevin ideyalarının yaşadılması, onun şah əsəri olan müstəqil Azərbaycanın qorunub inkişaf etdirilməsi hər bir vətəndaşın borcudur. Universitet rəhbərliyi Ümummilli Liderin xatirəsinin Azərbaycan xalqı tərəfindən daim böyük ehtiramla yad ediləcəyini, onun siyasi irsinin gələcək nəsillər üçün yol göstəricisi olaraq qalacağını qeyd edib.
Sonda vurğulanıb ki, Heydər Əliyevin dünya şöhrətli məzunu olduğu Bakı Dövlət Universiteti üçün də onun xatirəsi qürur mənbəyidir və müstəqil, qüdrətli Azərbaycan Ulu Öndərin ən böyük abidəsidir.