Astara rayon sakini, 1955-ci il təvəllüdlü Cümşüdova Gülbadam Qüdrət qızı ilə keçmiş dövrün təhsili və informasiya vasitələri barədə maraqlı reportaj söhbəti etdik.
“Tehsil365” xəbər verir ki, Müasir texnologiyaların geniş yayıldığı bir zamanda, onun uşaqlıq və gənclik dövrü barədə danışdıqları bizi bir neçə onillik geriyə — qəzetlərin poçtalyonla gəldiyi, televiziyanın sadə, amma dolğun proqramlarla zəngin olduğu dövrə apardı.
"İndi təhsil daha yaxşıdır"
Söhbətimizə müasir təhsil sistemindən başlayan Gülbadam xanım bildirdi ki, bu gün təhsilə maraq daha yüksəkdir:
"İndiki təhsil bizim dövrün təhsilindən daha yaxşıdır. Çünki indi uşaqların oxumağa marağı daha çoxdur", – deyə o qeyd etdi.
Qəzetlər və məktəb həyatı
Onun sözlərinə görə, orta məktəb təhsili əvvəl 8 illik idi. Əlavə təhsil almaq istəyənlər isə şəhərə gedərək 10-11-ci siniflərə davam edirdilər. O illərdə poçtalyon hər gün evlərə qəzet və jurnallar çatdırırdı.
"Kommunist, Pravda, Azərbaycan gəncləri, Bakiniski Raboçi, Pioner, Qadınlar və Proqram qəzeti poçtalyon tərəfindən evimizə gətirilirdi", – deyə xatırlayır.
Qəzetlərin abunə haqqı və dəstək
Cümşüdova qeyd edir ki, işsizlərin qəzet-jurnal abunəsini dövlət qarşılayırdı. İşləyənlərin isə maaşından cüzi miqdarda — təxminən 15 qəpik tutulurdu.
"Biz hər gün 3 qəzet, 3 jurnal sifariş verirdik. Evdə hamı oxuyurdu", – deyir o.
Texnologiyasız qəzet oxumaq...
Texnologiya olmasa, yenə də məmnuniyyətlə qəzet oxuyacağını deyən müsahibimiz belə davam edir:
"Mən hər zaman qəzet oxumağı sevmişəm. Yemək yeyərkən, çay içərkən belə qəzet oxuyardım. Çox evdə belə idi. Hər kəs oxuyardı."
Televiziya proqramları da sadə, amma maraqlı idi
Sonda televiziyadan danışan Gülbadam xanım, o dövr televiziyasının Azərbaycan, rus və hind filmləri, eləcə də iki dildə yayımlanan cizgi filmləri ilə yadda qaldığını vurğuladı.
"Azərbaycanın köhnə filmləri, rusca və hind filmləri göstərilirdi. Uşaqlar üçün isə Azərbaycan və rus dillərində cizgi filmləri olurdu", – deyə xatırlayır.
Bu nostalji söhbət, keçmiş nəsillərin informasiya ilə təmasını və təhsilə verdiyi dəyəri göstərməklə yanaşı, bu günün imkanlarını da daha yaxşı qiymətləndirməyə çağırır.