Xarici təhsil sənədlərinin tanınması üçün müraciət edən şəxslər bir sıra sənədləri təqdim etməlidirlər.
“Tehsil365” xəbər verir ki, orta ixtisas təhsili üzrə müraciət zamanı diplomun və ona aid apostilin orijinal nüsxəsinin rəngli skan versiyası, həmçinin transkript və ona aid apostilin rəngli skanı tələb olunur.
Diplomun və transkriptin, eləcə də onlara aid apostillərin rus, ingilis və türk dilləri istisna olmaqla Azərbaycan dilinə notariat qaydada təsdiq edilmiş tərcümələri təqdim edilməlidir. Bundan əlavə, müraciət edən şəxsin şəxsiyyət vəsiqəsinin hər iki üzü, xarici vətəndaşlar üçün isə daimi və ya müvəqqəti yaşama icazəsi, xarici pasportun ön səhifəsi və sərhədkeçmə möhürləri olan bütün səhifələr rəngli şəkildə skan edilərək təqdim olunmalıdır. Həmçinin hərbi biletin rəngli skanı və ya hərbi xidmətin qeydiyyatı haqqında arayışın elektron surəti tələb edilir.
Bakalavr səviyyəsi üzrə müraciət zamanı ali təhsil haqqında sənədin (diplomun) və ona aid apostilin rəngli skanı, diplom əlavəsinin (transkriptin) və apostilin rəngli skanı təqdim olunmalıdır. Bu sənədlərin rus, ingilis və türk dilləri istisna olmaqla Azərbaycan dilinə notariat qaydada təsdiq olunmuş tərcümələri də əlavə edilməlidir. Şəxsiyyət vəsiqəsinin hər iki üzünün, xarici pasportun bütün mühüm səhifələrinin, eləcə də hərbi biletin və ya hərbi qeydiyyat arayışının elektron surəti təqdim edilməlidir. Əgər müraciət edən şəxs təhsil müddətində müəssisələrarası və ya müəssisədaxili köçürülmə edibdirsə, köçürülmə ilə bağlı rəsmi arayışın skanı tələb olunur. Həmçinin bakalavriat səviyyəsinə orta ixtisas təhsili diplomu əsasında qəbul olunmuş şəxslər həmin diplomun skan versiyasını təqdim etməlidirlər.
Magistratura səviyyəsində müraciət edənlər ali təhsil haqqında sənədin (diplomun) və apostilin rəngli skanını, həmçinin transkript və apostilin rəngli skanını təqdim etməlidirlər. Bu sənədlərin Azərbaycan dilinə notariat qaydasında təsdiq edilmiş tərcümələri (rus, ingilis və türk dilləri istisna olmaqla) də tələb olunur. Şəxsiyyət vəsiqəsinin hər iki üzü, xarici pasportun bütün mühüm səhifələri, hərbi bilet və ya hərbi xidmət qeydiyyatı haqqında arayış, həmçinin bakalavr diplomunun rəngli skanı sistemə yüklənməlidir.
Qeyd edək ki, magistratura üzrə müraciət edildikdə və bakalavr diplomu xarici ali təhsil müəssisəsi tərəfindən verildikdə, əvvəlcə həmin diplom üzrə kvalifikasiyanın tanınması üçün ayrıca müraciət edilməlidir. Tələb olunan sənədlər yalnız elektron ərizə vasitəsilə şəxsi kabinetə yüklənməlidir; elektron poçt, məktub və ya fiziki sənəd qəbulu aparılmır. Diplom və transkript tanınma üçün müraciət olunmadan əvvəl verildiyi ölkədə leqallaşdırılmalıdır. Hər bir sənəd PDF formatında və 5 MB-dan artıq olmamaqla rəngli və oxunaqlı şəkildə sistemə əlavə edilməlidir.