Tailandın paytaxtı Bankokda keçirilən World Mathematics Team Championship yarışında Azərbaycan komandası böyük uğur əldə edib. Kaliforniya Berkeley Universiteti tərəfindən təsis olunan bu nüfuzlu beynəlxalq riyaziyyat çempionatında ölkəmizi Global Olympiad Center adından təmsil edən “Zəfər” komandası Advanced kateqoriyasında 3-cü yerə layiq görülüb.
“Tehsil365” xəbər verir ki, Bu kateqoriya dünya üzrə ən güclü riyazi komandaların mübarizə apardığı qrupdur. Şagirdlərimiz Çin, ABŞ, Bolqarıstan, Yaponiya, Cənubi Koreya, Avstraliya kimi 20-dən çox ölkənin komandaları ilə rəqabətdə yüksək nəticə göstəriblər.
Komandanın tərkibi:
Kənan Sadıxov - Gəncə şəhər fizika, riyaziyyat və informatika təmayüllü respublika lisey
Nuray Hüseynli - Oxbridge Academy
Raul Quvalov - 72 nömrəli məktəb liseyi
Zəhra Abdullazada - 23 saylı tam orta məktəb
Ziya İsmayılov - Landau School
Yarış üç mərhələdən ibarət olub. İlk mərhələdə iştirakçılar fərdi raundda riyazi tapşırıqları həll ediblər. Ardınca yarım-komanda mərhələsi olan Estafet Raundu keçirilib. Son mərhələdə isə tam komanda raundu baş tutub və şagirdlər bu hissədə yüksək koordinasiya, məntiqi düşünmə və komanda işi nümayiş etdiriblər.
Azərbaycan komandasının əldə etdiyi bu nəticə ölkəmizin riyaziyyat sahəsində artan potensialının və şagirdlərimizin beynəlxalq arenada güclü rəqiblər fonunda öz sözünü deməsinin daha bir göstəricisidir.
Qeyd edək ki, növbəti il Dünya Riyaziyyat Çempionatı - WMTC 2026 Global Olympiad Centerin təşkilatçılığı ilə 29 noyabr – 2 dekabr 2026-c il tarixlərində Azərbaycanda keçiriləcək. Dünyanın müxtəlif ölkələrindən yüzlərlə şagird Bakı şəhərində mübarizə aparacaq.
