"Qısa iş gününün daha az iş görmək demək olduğu fikri artıq qabaqcıl ölkələrdə təkzib edilib. Bu yanaşma uzun müddətdir mövcud olan və reallığı əks etdirməyən bir mif hesab edilə bilər".
“Tehsil365” xəbər verir ki, bu barədə psixoloq Aleksandr Miller News.ru-ya açıqlamasında bildirib.
Onun sözlərinə görə, İsveçdə 2015-2017-ci illərdə qocalar evlərində altı saatlıq iş gününün tətbiqi ilə bağlı pilot layihə həyata keçirilib. Nəticələr göstərib ki, tibb bacıları daha sağlam və enerjili olublar, göstərilən tibbi xidmətin keyfiyyəti isə yüksəlib. Niderlandda orta iş həftəsi 29 saat, Danimarkada isə 32,4 saat təşkil edir.
Psixoloq qeyd edib ki, İslandiyada uğurlu sınaq layihələrindən sonra işçilərin 86 faizinə əməkhaqqı azaldılmadan 35 saatlıq iş həftəsi tətbiq olunub. Belçika 2022-ci ildə Avropada qanuni şəkildə dördgünlük iş həftəsinə keçən ilk ölkə olub. 2021-ci ildən etibarən isə Yaponiya hökuməti könüllü əsaslarla dördgünlük iş həftəsinin tətbiqini təşviq edir.
"Bütün bu nümunələr gələcəkdə Rusiyada da daha qısa iş həftəsinin mümkün olduğunu sübut edir. Axı biz yaşamaq üçün işləyirik, işləmək üçün yaşamırıq", - deyə Aleksandr Miller vurğulayıb.