Mingəçevir Dövlət Universiteti (MDU) ilə İnnovasiya və Rəqəmsal İnkişaf Agentliyinin nəzdində fəaliyyət göstərən Azərbaycan Kibertəhlükəsizlik Mərkəzi (AKM) arasında mövcud əməkdaşlıq çərçivəsində noyabrın 26–28-də kibertəhlükəsizlik sahəsində praktikyönümlü vörkşoplar, təlimlər və maarifləndirici infosessiyalar təşkil olunub.
“Tehsil365” Azərtac-a istinadən xəbər verir ki, tədbirlərdə AKM-in nümayəndələri Nemət Rəhimli və Gülyaz İsmayılzadə iştirak ediblər. Proqramın ilk günündə MDU tələbələri üçün iki saatlıq intensiv tədris sessiyası keçirilib. Sessiya zamanı müasir kibertəhlükəsizlik mühitində müdafiə yanaşmaları, “Blue Team” komandasının əsas funksiyaları və informasiya təhlükəsizliyinin təminində tətbiq olunan qabaqcıl texnoloji həllər barədə ətraflı məlumat verilib. Təlim çərçivəsində SIEM, SOAR, EDR/XDR və IDS/IPS kimi təhlükəsizlik alətlərinin işləmə prinsipləri izah olunub, “real log” analizləri üzərində praktiki nümunələr nümayiş etdirilib.
İkinci gün universitetin akademik heyəti üçün təşkil olunan maarifləndirici təlimdə iş mühitində kibertəhlükəsizlik və kibergigiyena mədəniyyətinin formalaşdırılması mövzularına toxunulub. Təlim zamanı sosial mühəndislik hücumları – “phishing” və “vishing” nümunələri təhlil edilib, parol menecmenti, e-poçt təhlükəsizliyi və həssas məlumatların düzgün idarə olunması ilə bağlı praktiki tövsiyələr təqdim edilib.
Təlimin son günündə AKM-in 7-ci dalğa qəbul proqramına həsr olunmuş infosessiya keçirilib. İştirakçılara proqramın məqsədi, qəbul prosesi, əsas tələblər və təqdim etdiyi imkanlar barədə ətraflı məlumat verilib. Ardınca baş tutan “Remote Compromise – Windows 10” adlı praktiki vörkşopda “phishing” hücumlarının real ssenariləri, “Cyber Kill Chain” modeli üzrə hücum mərhələlərinin analizi aparılıb, “Windows 10” əməliyyat sisteminin uzaqdan ələ keçirilməsi texnikaları nümayiş etdirilib və bu cür hücumlara qarşı effektiv müdafiə üsulları praktik şəkildə öyrədilib.
Keçirilən təlim və vörkşoplar MDU-nun akademik heyəti və tələbələrinin kibertəhlükəsizlik sahəsində bilik və praktiki bacarıqlarının artırılmasına töhfə verib, eyni zamanda, universitet ilə AKM əməkdaşlığının gələcək inkişaf perspektivlərinin daha da möhkəmləndirilməsinə xidmət edib.
