Azərbaycan Respublikasının Gənclər Fondunun dəstəyi, Azərbaycanlı Tələbələr və Məzunlar Platformasının (ASAP) təşkilatçılığı ilə Türkiyə, Gürcüstan, İtaliya və Çin Xalq Respublikasında 12 dekabr - Ümummilli Lider Heydər Əliyevin anım gününə həsr olunmuş silsilə tədbirlər keçirilib.
“Tehsil365” xəbər verir ki, Türkiyənin Yalova şəhərində Azərbaycan Respublikası Gənclər Fondunun dəstəyi, Azərbaycanlı Tələbələr və Məzunlar Platfoması (ASAP) və Yalova Universitetinin Türk Dünyası Klubunun birgə təşkilatçılığı ilə Ümummilli Lider Heydər Əliyevin anım gününə həsr olunmuş tədbir keçirilib. Azərbaycanlı tələbə və məzunların iştirakı etdiyi görüşdə ölkəmizin inkişaf strategiyasının müəllifi, dövlətçilik ənənələrimizin möhkəmləndirilməsində müstəsna rola sahib Ulu Öndərin xalqımız qarşısındakı misilsiz xidmətləri, həmçinin gənclərə göstərdiyi yüksək qayğıdan danışılıb. Çıxışlarda bildirilib ki, bu gün müasir və güclü Azərbaycanın əldə etdiyi nailiyyətlər dahi liderin müəyyənləşdirdiyi strateji yolun davamı olaraq Prezident İlham Əliyevin rəhbərliyi ilə daha da inkişaf etdirilir. Daha sonra tədbir Ulu Öndərin çoxşaxəli fəaliyyətini əks etdirən videoçarxlar və onun zəngin irsini əhatə edən fotosərginin nümayişi ilə davam edib.
Gürcüstanın Tbilisi şəhərində isə azərbaycanlı gənclər Ulu Öndərin həmin şəhərdə yerləşən abidəsini ziyarət ediblər. Ziyarət zamanı abidənin önünə gül çələngi qoyulub, Ümummilli Liderin əziz xatirəsi dərin hörmət və ehtiramla anılıb. Gənclər bildiriblər ki, Ümummilli Liderin müəyyənləşdirdiyi dövlətçilik ideyaları bu gün də Azərbaycan gəncliyi üçün yol xəritəsi rolunu oynayır və hər bir gəncin ölkəsinə bağlılığının, milli kimliyinin daha da güclənməsinə xidmət edir.
İtaliyanın paytaxtı Roma şəhərində də Ümummilli Liderin anım günü ilə əlaqədar tədbir keçirilib. Tədbirdə çıxış edən ölkəmizin İtaliyadakı səfiri Rəşad Aslanov Ulu Öndərin şərəfli ömür yolundan bəhs edib, onun ölkəmizin tərəqqisi üçün misilsiz xidmətlərini gələcək nəsillərin heç vaxt yaddan çıxarmayacağını bildirib. Səfir vurğulayıb ki, bütün həyatını Azərbaycan xalqının rifahına, ölkəmizin iqtisadi, siyasi, mədəni inkişafına həsr edən dahi şəxsiyyət Azərbaycanın regional gücə çevrilməsi üçün siyasi-strateji kursun təməlini qoyub. O cümlədən, Ulu Öndərin həyat yolu, dövlətçilik irsi və Azərbaycanın inkişafına verdiyi misilsiz töhfələri əks etdirən “İz” filmi nümayiş olunub.
Çinin Vençjou şəhərində 12 dekabr - Ulu Öndər Heydər Əliyevin anım gününə həsr olunmuş dəyirmi masa görüşü keçirilib. Çində təhsil alan azərbaycanlı tələbələrin iştirakı ilə keçirilən tədbir zamanı Ümummilli Liderin əziz xatirəsinin hər bir azərbaycanlının qəlbində əbədi yaşadığı, böyük ehtiramla yad edildiyini bildirilib. Gənclər qeyd ediblər ki, müasir Azərbaycan tarixinin 30 ildən artıq bir dövründə respublikamıza rəhbərlik edən dahi lider dövlətçilik salnaməsində öyrənilməsinə, təbliğinə və tətbiqinə daim böyük ehtiyac olacaq irs yaradıb. Daha sonra Ulu Öndərin həyat və yaradıcılığını əks etdirən videoçarx nüamayiş etdirilib.
Türkiyədə keçirilən tədbirlərin davamı olaraq İstanbul şəhərində təhsil alan azərbaycanlı gənclər tərəfindən Ümummilli Lider Heydər Əliyevin abidəsi ziyarət edilib. Gənclər abidənin önünə gül çələngi qoyaraq Ulu Öndərin əziz xatirəsini dərin hörmət və ehtiramla yad ediblər. Ziyarət zamanı iştirakçılar həmçinin Ümummilli Lider Heydər Əliyevin Türkiyə–Azərbaycan münasibətlərinin möhkəmlənməsində oynadığı tarixi roldan, “bir millət, iki dövlət” fəlsəfəsinin formalaşmasındakı əvəzsiz xidmətlərindən bəhs ediblər.
