Gəncədə dünyaya göz açan və gənc yaşına baxmayaraq artıq oxucu auditoriyası qazanan Aydan İsmayılova çağdaş gənc yazarlar arasında diqqət çəkən imzalardandır.
"Tehsil365" xəbər verir ki, 2007-ci ildə Gəncə şəhərində anadan olan Aydan İsmayılova hazırda Gəncə Dövlət Universitetinin Tarix–Coğrafiya fakültəsinin II kurs tələbəsidir.
Yazıçı yaradıcılığa 16 yaşında başladığını bildirir. Onun sözlərinə görə, yazı zamanla daxili aləminin aynasına çevrilib:
“Yazmağa başladığım gündən etibarən sözlər mənim üçün sadəcə ifadə vasitəsi deyil, düşüncələrimi və hisslərimi əks etdirən bir güzgü oldu”, – deyə o vurğulayır.
Romanla yanaşı, müxtəlif mövzuları əhatə edən hekayələr də qələmə alan gənc müəllifin bir sıra hekayələri “Zərif Kölgələr” saytında yayımlanıb və oxucular tərəfindən maraqla qarşılanıb.
Fərhad – ədalətin tərəfini tutan obraz
Aydan İsmayılovanın hazırda üzərində düşündüyü və oxuculara təqdim etdiyi əsas əsərlərdən biri “Ədalətin Təqibində” adlanır. Əsərin baş qəhrəmanı Fərhad obrazı xüsusi psixoloji dərinliyi ilə seçilir. Müəllif bildirir ki, bu obrazı yaradarkən onun ədalətpərəst, qətiyyətli və daxili ziddiyyətlər yaşayan bir şəxsiyyət olmasına xüsusi önəm verib.
Fərhadın xarakterinin formalaşmasında uşaqlıq travmaları, atası ilə bağlı ağır hadisələr və hüquq yolunu seçməsi əsas rol oynayır. Atasının taleyi və qətl hadisəsi əsərdə ədalət və həqiqət mövzularını daha da gücləndirir. Fərhad hisslərinə deyil, faktlara əsaslanaraq hərəkət edir və bu da onu oxucu üçün həm mürəkkəb, həm də inandırıcı bir obraz kimi təqdim edir.
Hüquqi reallıq və mənəvi seçimlər
Əsərdə təsvir olunan hüquqi proseslər reallığa uyğun qurulub. Müəllif hüquq sahəsində birbaşa təcrübəsi olmasa da, araşdırmalara və hüquqi mənbələrə əsaslandığını qeyd edir:
“Məqsədim vəkilin qarşılaşdığı çətinlikləri və hadisələrin gedişini mümkün qədər real göstərmək idi”, – deyə Aydan İsmayılova bildirir.
Fərhadın sevgi və ailə münasibətləri bəzən onun peşə prinsipləri ilə toqquşur. Lakin o, bütün hallarda ədalətli və doğru qərar verməyə çalışır. Əsərin sonunda isə atası ilə bağlı bütün sirlər açılır və həqiqət oxucuya aydın şəkildə təqdim olunur.
Oxucuya verilən mesaj
Gənc yazıçı əsərlə vermək istədiyi əsas mesajın ədalət və həqiqətin hər zaman önəmli olması olduğunu deyir. Onun fikrincə, həyatdakı çətinliklərə və haqsızlıqlara baxmayaraq insan doğru olanı axtarmalıdır.
“Həqiqət bəzən görünməz olur, amma onu üzə çıxarmaq mümkündür”, – deyə o əlavə edir.
Əsərin ekranlaşdırılması məsələsinə də toxunan Aydan İsmayılova bildirir ki, bu, bir qədər oxucuların münasibətindən asılıdır:
“Əgər Fərhad obrazını həqiqətən sevərlərsə, niyə də olmasın? Ekranlaşdırma təklifi olarsa, məmnuniyyətlə qəbul edərdim. Aktyor seçimi barədə isə hələ düşünməmişəm”.
Hazırda “Ədalətin Təqibində” üzərində düşünən və yaradıcılıq yolunu davam etdirən Aydan İsmayılova gənc yaşına baxmayaraq ədəbiyyatda öz sözünü deməyə iddialı yazarlardandır.