“Son illər ümumtəhsil məktəblərində şagirdlərin dərsə marağının azalması və təhsil keyfiyyəti ilə bağlı problemlər daha çox müzakirə olunur. Xüsusilə dərs yükünün çoxluğu, əzbərçiliyin üstünlük təşkil etməsi və psixoloji amillər şagirdlərin motivasiyasına mənfi təsir göstərir”
Təhsil eksperti Ramin Nurəliyev mövzu ilə bağlı “Tehsil365”ə açıqlamasında bildirib ki, bu problem yalnız şagirdlərlə bağlı deyil, sistemli yanaşma tələb edir:
“Təhsil sistemində əsas məqsəd təkcə bilik ötürmək yox, şagirdin düşünmə və analiz bacarığını inkişaf etdirmək olmalıdır. Hazırda bir çox məktəbdə qiymət əsas götürülür, amma şagirdin marağı və psixoloji durumu arxa planda qalır. Bu da nəticədə təhsilin keyfiyyətinə təsir edir.”
Ekspertin sözlərinə görə, “müəllim–şagird münasibətlərinin düzgün qurulması və müasir tədris metodlarının tətbiqi vacibdir”
“Əgər dərslər daha interaktiv və praktik formada keçirilsə, şagirdlər özlərini daha rahat ifadə edə və təhsilə maraqları arta bilər. Valideyn, müəllim və məktəb rəhbərliyi arasında əməkdaşlıq da mühüm rol oynayır.”
“Mütəxəssislər hesab edirlər ki, təhsil sahəsində aparılacaq islahatlar uzunmüddətli və davamlı olmalı, şagirdlərin həm akademik, həm də şəxsi inkişafını təmin etməlidir”.