Baş ağrısı insanların gündəlik həyatında ən çox rast gəlinən sağlamlıq problemlərindən biridir. Bu hal bəzən yorğunluqla bağlı olsa da, bəzi hallarda ciddi sağlamlıq problemlərinin əlaməti kimi də ortaya çıxa bilər.
“Tehsil365”in araşdırmasına əsasən, baş ağrısının əsas səbəbləri arasında stress, yuxusuzluq, susuzluq, uzun müddət ekrana baxmaq, hava dəyişiklikləri və düzgün qidalanmama yer alır. Xüsusilə qış aylarında orqanizmdə maye çatışmazlığı və vitamin azlığı baş ağrılarının artmasına səbəb olur.
Baş ağrısının ən çox rast gəlinən növləri gərginlik tipli baş ağrısı və miqrendir. Gərginlik tipli baş ağrıları adətən günün sonunda, boyun və çiyin əzələlərinin gərginləşməsi fonunda yaranır. Miqren isə daha şiddətli olur və ürəkbulanma, işığa və səsə həssaslıqla müşayiət edilə bilər.
Həkimlər xəbərdarlıq edir ki, tez-tez təkrarlanan və uzun müddət keçməyən baş ağrıları zamanı özbaşına dərman qəbul etmək düzgün deyil. Belə hallarda mütləq mütəxəssisə müraciət edilməlidir. Gün ərzində kifayət qədər su içmək, yuxu rejiminə əməl etmək, stressi azaltmaq və sağlam qidalanma baş ağrılarının qarşısının alınmasında mühüm rol oynayır.
Qeyd edək ki, baş ağrısı qəfil başlayırsa, görmə pozğunluğu, nitqdə çətinlik və ya huşun itməsi ilə müşayiət olunursa, bu zaman təcili tibbi yardım çağırmaq vacibdir.