Azərbaycan təsviri sənətinin klassiki, rəngkarlıq məktəbinin parlaq nümayəndəsi Səttar Bəhlulzadə 1909-cu ilin 15 dekabrında Bakının Əmircan kəndində dünyaya gəlib.
“Tehsil365” xəbər verir ki, Azərbaycan impressionizminin banisi sayılan Səttar Bəhlulzadə yaratdığı təbiət mənzərələri, dərin ruhlu kompozisiyaları ilə sənət tariximizə silinməz iz buraxıb. Onun əsərləri yalnız fırçanın deyil, vətənə duyulan böyük sevginin məhsulu olub.
Rəssamın yaradıcılığı Azərbaycan hüdudlarını aşaraq Moskvada, Praqada, Parisdə, Nyu-Yorkda, Londonda, Berlində və digər şəhərlərdə keçirilən sərgilərdə nümayiş olunub. Bu sərgilər vasitəsilə Azərbaycan təbiətinin gözəlliyi və Bəhlulzadənin bənzərsiz baxışı dünya ictimaiyyətinə təqdim olunub.
1960-cı ildə “Əməkdar incəsənət xadimi”, 1963-cü ildə “Azərbaycan SSR xalq rəssamı” fəxri adlarına layiq görülən Bəhlulzadə 1972-ci ildə isə Azərbaycan SSR Dövlət mükafatına layiq görülüb.
Səttar Bəhlulzadə 1974-cü il oktyabrın 13-də Moskvada vəfat edib. Onun irsi bu gün də sənətsevərləri heyran edir və Azərbaycan incəsənətinin qızıl səhifələrindən biri kimi yaşayır.