15 dekabr tarixinin seçilməsi təsadüfi deyil. Məhz bu gün – 1893-cü il 15 dekabrda məşhur danimarkalı alim Vilhelm Tomsen Orxon-Yenisey yazılarını deşifrə edərək, türk dillərinin ən qədim yazılı abidələrinin sirrini dünyaya açmışdı. Bu hadisə türk dilinin tarixi dərinliyini, zənginliyini və mədəni potensialını elmi şəkildə təsdiqləyən dönüş nöqtəsi hesab olunur.
“Tehsil365” Müsavat.com-a istinadən xəbər verir ki, UNESCO-nun qəbul etdiyi qərarda vurğulanır ki, türk dili ailəsinə daxil olan dillər bu gün Avrasiya məkanında geniş coğrafiyada yayılıb və 200 milyondan artıq insanın ana dili və ya ünsiyyət vasitəsidir. Bu dillər təkcə kommunikasiya vasitəsi deyil, eyni zamanda minilliklər boyu formalaşmış sivilizasiya, dövlətçilik ənənəsi, mədəniyyət və mənəvi irsin daşıyıcısıdır.
Türk Dövlətləri Təşkilatı və türk dünyasına aid qurumlar UNESCO-nun bu qərarını tarixi ədalətin bərpası və ortaq mədəni kimliyin beynəlxalq səviyyədə tanınması kimi qiymətləndiriblər. Bildirilir ki, 15 dekabr bundan sonra yalnız bir anım günü deyil, həm də türk dili uğrunda mübarizə aparmış, bu dili yaşatmış və gələcəyə daşıyan bütün nəsillərin xatirəsinə ehtiram günü olacaq.
Beləliklə, 15 dekabrın Dünya Türk Dili Ailəsi Günü kimi təsis edilməsi, türk dili və türk dünyası üçün qürurverici, gələcəyə ümid verən və mədəni birlik ideyasını gücləndirən əlamətdar beynəlxalq hadisədir.