Azərbaycan Milli Elmlər Akademiyasının (AMEA) Gəncə Bölməsi Nizami Gəncəvi Mərkəzinin “Nizamişünaslıq” elmi əsərlər jurnalının 13-cü nömrəsi çapdan çıxıb.
“Tehsil365” xəbər verir ki, jurnalın bu nömrəsi Azərbaycan Milli Elmlər Akademiyasının 80 illik yubileyinə həsr olunub.
Jurnalda dahi Azərbaycan şairi və mütəfəkkiri Nizami Gəncəvinin həyat və yaradıcılığı, Nizami Gəncəvi yaradıcılığında fəlsəfi fikir, Nizami və Gəncə, Nizami Gəncəvinin əxlaq dərsləri, Nizami Gəncəvi yaradıcılığı üzrə filoloji tədqiqlər monoqrafiyasında yer alan araşdırmalar, Azərbaycanda Şərq intibahı dövrünün arxeoloji və etno-mədəni irsinə dair tədqiqatlar, Nizami Gəncəvi irsi akademik tədqiqat və tədrisdə, Nizami Gəncəvi yaradıcılığında ölüm fəlsəfəsi, Nizami Gəncəvi yaradıcılığında Leyladan-Mövlaya və başqa məqalələr Azərbaycan, “Ganja quyoshiki ko ̳targach alam”, “Ayladi soz mamlakatin yakqalam” məqaləsi özbək, “Nizami Gencevi ve “Hamsesi””, “Nizâmi izinde: geç dönem çağatay türkçesinde mensur bir “İskendername” nüshasi üzerine”, “Nizami Gencevinin hayatı, vakfiyesi ve Gence‘de kurulan diğer vakiflar hakkinda bazi tetkikler, Gence şehrinin tarihi süreci”, “Şiir hukuku və Nizaminin şiiri meşrulaştırma girişimi” kimi məqalələr isə türk dilində nəşr edilib.
“Nizamişünaslıq” elmi əsərlər jurnalı ildə iki dəfə nəşr olunmaqla Azərbaycan, türk, özbək, ingilis, rus və digər dillərdə məqalə qəbul edir. Nəşrin nüsxələri müvafiq kitabxanalara paylanılmaqla, elektron variantı da ayrıca olaraq https://ameagb.az/az/content/71 saytında yerləşdirilir. Jurnal Beynəlxalq Standart Seriya Nömrəsi (ISSN), Rəqəmsal Obyekt İdentifikatoru (DOI) standartları ilə nəşr olunmaqla yanaşı, Azərbaycan Respublikasının Prezidenti yanında Ali Attestasiya Komissiyasının filologiya elmləri üzrə tövsiyə olunan dövri elmi nəşrlər siyahısına daxildir.
Redaksiya heyətində Azərbaycan, Türkiyə, Özbəkistan, Pakistandan olan alimlərin yer aldığı “Nizamişünaslıq” elmi əsərlər jurnalının redaktoru AMEA Gəncə Bölməsinin elmi işlər üzrə sədr müavini, filologiya üzrə fəlsəfə doktoru, dosent Əlimuxtar Muxtarov, məsul katibi şöbə müdiri, filologiya üzrə fəlsəfə doktoru Təranə Verdiyevadır.