“Təhsil sahəsində innovativ məktəb nümunəsi dəyərləndiriləcək”.
“Tehsil365” xəbər verir ki, bunu “Azərbaycan müəllimi”nə açıqlamasında Təhsildə Keyfiyyət Təminatı Agentliyinin (TKTA) İdarə Heyətinin sədri Tural Əhmədov səsləndirib.
O bildirib ki, bu gün keçirilən tədbirin məqsədi Elm və Təhsil Nazirliyinin dəstəyi ilə qrant layihəsi çərçivəsində innovativ məktəb nümunəsini yaratmaqdır:
“Bu prosesdə 56 nömrəli məktəb fəal iştirak edir və layihə təqdim olunaraq müvafiq kriteriyalar əsasında qiymətləndirilir”.
Tural Əhmədov qeyd edib ki, 56 nömrəli məktəbin fəaliyyəti müvafiq meyarlar əsasında dəyərləndiriləcək. Bu meyarların hazırlanması layihənin tərkib hissəsi olaraq Təhsildə Keyfiyyət Təminatı Agentliyinin üzərinə düşür və agentliyin ekspertlərinin dəstəyi ilə məktəb yalnız tədrisin təşkilində deyil, həm də ləyaqətli vətəndaş yetişdirilməsi sahəsindəki roluna görə qiymətləndiriləcək.
Sədrin sözlərinə görə, bu akkreditasiya prosesi məktəb üçün təcrübə xarakteri daşıyır və eyni zamanda keyfiyyət monitorinqinin daha yüksək səviyyədə həyata keçirilməsini təmin edir. Qiymətləndirmə yalnız bu mərhələdə bitməyəcək. 56 nömrəli məktəbin heyəti özünü qiymətləndirmə hesabatının hazırlanması üçün təlimlərdə iştirak edəcək. Həmçinin sahə baxışları həyata keçiriləcək, fəaliyyət planları tərtib olunacaq və məktəb üçün tövsiyələr veriləcək. Tövsiyələr məktəbin inkişaf mərhələlərinin müəyyənləşdirilməsində əsas rol oynayacaq və bu təcrübə digər təhsil müəssisələrinə də tətbiq ediləcək.
Tural Əhmədov vurğulayıb ki, bu layihə məktəb akreditasiyası yolunda dəyərləndirmədir. Məqsəd məktəbin mövcud fəaliyyətini qiymətləndirmək, təhlil hesabatlarını hazırlamaq, sahə baxışlarını keçirmək və fəaliyyət planları əsasında inkişaf yolunu müəyyən etməkdir.
Sonda o qeyd edib ki, bu pilot layihə və hazırlanmış meyarlar akkreditasiya yolunda vacib bir addımdır. Bu çərçivədə keçiriləcək qiymətləndirmələr gələcəkdə təhsil müəssisələrində daha dəqiq və əsaslı akkreditasiya prosesinin aparılmasına imkan yaradacaq.