Gənc yazar Pərviz Rzalı ilə keçirdiyimiz reportajda o, oxucuların maraqla qarşıladığı "Gecə Ovçusu" əsərinin davamı olan yeni kitabı — "Gecə Ovçusu: Küllərdən Doğulan" haqqında ətraflı məlumat verdi.
“Tehsil365” xəbər verir ki, Pərviz Rzalı bildirdi ki, yeni əsər əvvəlkinin davamıdır və hadisələr "Gecə Ovçusu"ndakı hadisələrdən iki il sonra baş verir. İlk bölümlər keçmiş Yuqoslaviyada, əsərin əsas hissəsi isə İngiltərədə cərəyan edir.
Əsəri davam etdirmək qərarını isə müəllif belə izah etdi: “İlk hekayə nisbətən qısa idi. Bu dəfə ümumi süjeti daha maraqlı və dərin etmək istədim.”
Kitabın üz qabığına da xüsusi önəm verən Pərviz Rzalı dizayn barədə də fikirlərini bölüşüb: “Cilddə Edvard Uilson kitabın ortasında yer alacaq, arxa fonda isə Big Ben görünəcək. Sağ tərəfdə Edvina Anderson, sol tərəfdə isə Darko Beliç olacaq. Darkonun fonunda döyüş səhnəsi, Edvinanın fonunda isə boz rəngli London təsvir ediləcək.”
Müəllif, qarşıdan gələn imtahanlara baxmayaraq, əsəri 2025-ci ilin mart ayına qədər tamamlamağı planlaşdırır, lakin yazının daha tez bitməsi də mümkündür.
Oxucular "Gecə Ovçusu" dünyasına tezliklə yeni bir fəsillə qovuşacaq.