Son illər xaricdə təhsil almağa maraq göstərən azərbaycanlı gənclərin sayı artmaqdadır. Xüsusilə Türkiyə universitetləri həm yaxın mədəniyyət, həm də praktik təhsil modeli ilə tələbələrin diqqətini cəlb edir.
Türkiyədə təhsil alan Emil İsmayılov “Tehsil365”ə açıqlamasında bu ölkədəki təhsil sistemi ilə Azərbaycandakı təhsil arasında əsas fərqlərdən danışıb.
Onun sözlərinə görə, Türkiyədə təhsil daha çox praktik yönümlü qurulub:
“Türkiyədə təhsil almaq mənim üçün həm fərqli bir təcrübə, həm də inkişaf imkanı oldu. Burada tələbələr yalnız nəzəri biliklərlə kifayətlənmir, eyni zamanda öyrəndiklərini dərhal tətbiq etmək imkanı qazanırlar. Dərslərdə layihələr, təqdimatlar və qrup işləri çox olur.”
Emil İsmayılov bildirib ki, bu yanaşma tələbələrin ünsiyyət və komanda bacarıqlarının inkişafında mühüm rol oynayır:
“Qrup işləri zamanı fikir mübadiləsi aparmaq, məsuliyyəti bölüşmək və nəticəyə birgə çatmaq tələbənin həm şəxsi, həm də peşəkar inkişafına ciddi təsir göstərir.”
O, Azərbaycandakı təhsil sisteminə də toxunaraq qeyd edib ki, burada tədris daha çox nəzəri biliklər üzərində qurulub:
“Azərbaycanda fənlər elmi və dərin şəkildə öyrədilir. Bu, böyük üstünlükdür. Amma bəzən praktiki tətbiq hissəsi zəif qalır. Daha çox məlumat toplayırıq, lakin onu real həyatda necə istifadə edəcəyimizi az öyrənirik.”
İsmayılovun fikrincə, Türkiyədə nəzəriyyə ilə praktika arasında balans daha düzgün qurulub və bu da məzunların əmək bazarına daha hazırlıqlı çıxmasına şərait yaradır.
Türkiyədə təhsil almaq istəyən gənclərə də tövsiyələr verən Emil İsmayılov vurğulayıb ki, bu proses ciddi hazırlıq tələb edir:
“Gələcək tələbələr oxumaq istədikləri ixtisas və universitet haqqında əvvəlcədən ətraflı araşdırma aparmalıdırlar. Çünki hər universitetin tədris sistemi və imkanları fərqlidir.”
O, dil məsələsinin də xüsusi önəm daşıdığını bildirib:
“Türk dili asan görünə bilər, amma akademik səviyyədə dərs keçmək, təqdimat hazırlamaq və yazı yazmaq üçün müəyyən hazırlıq lazımdır. Lazım gələrsə, təhsildən əvvəl dil kursu keçmək çox faydalı olar.”
Sonda Emil İsmayılov qeyd edib ki, Türkiyədə təhsil almaq yalnız diplom qazanmaq deyil, eyni zamanda müstəqil düşünməyi, məsuliyyət daşımağı və həyata daha real baxmağı öyrədir.