Bu gün Azərbaycanın görkəmli ədiblərindən biri, xalq şairi Osman Sarıvəllinin anadan olmasının 118-ci ildönümüdür.
"Tehsil365" xəbər verir ki, Əsl adı Osman Abdulla oğlu Qurbanov olan şair 1905-ci il dekabrın 17-də Qazax qəzasının İkinci Şıxlı kəndində dünyaya gəlib.
Ədəbiyyata erkən yaşlardan maraq göstərən Osman Sarıvəli yaradıcılığında xalq poeziyasının ruhunu yaşadaraq, klassik irslə müasir düşüncəni vəhdətdə təqdim edib. Onun şeirlərində vətən, insan, əxlaq, əmək və mənəviyyat mövzuları əsas yer tutur.
1937-ci ildən Azərbaycan Yazıçılar Birliyinin üzvü olan Sarıvəli həm də elmi fəaliyyətlə məşğul olub, Azərbaycan EA-nın Nizami adına Dil və Ədəbiyyat İnstitutunda müdir müavini vəzifəsində çalışıb.
Əmək və ədəbiyyat sahəsindəki xidmətlərinə görə 1977-ci ildə ona "Azərbaycan SSR xalq şairi" fəxri adı verilib. Osman Sarıvəli 1990-cı ilin iyul ayında Bakıda vəfat edib.
Azərbaycan ədəbiyyatının inkişafında özünəməxsus yeri olan şairin yaradıcılığı bu gün də oxunur və araşdırılır.