Bu gün tanınmış jurnalist, publisist və ictimai xadim Nəcəf Nəcəfovun vəfatından 26 il ötür.
"Tehsil365" xəbər verir ki, O, 17 dekabr 1999-cu ildə Bakıda dünyasını dəyişib.
Nəcəf Adil oğlu Nəcəfov 24 iyun 1955-ci ildə Bakıda anadan olub. O, Azərbaycanın müstəqillik dövründə formalaşan və inkişaf edən mətbuatının qurucularından biri sayılır. Peşəkar jurnalistika prinsiplərinə sadiqliyi, obyektiv və vicdanlı yanaşması ilə həm oxucuların, həm də jurnalist həmkarlarının rəğbətini qazanıb.
Nəcəf Nəcəfov müasir media məkanında azad sözün, demokratik dəyərlərin təbliğində mühüm rol oynamış, ölkədə müstəqil mətbuatın bünövrəsinin qoyulmasında əvəzsiz xidmətlər göstərmişdir. O, bir sıra nüfuzlu qəzet və jurnallarda çalışmış, redaktor və rəhbər vəzifələrdə fəaliyyət göstərmişdi.
Jurnalistikanın yüksək peşəkarlıq və vətəndaş mövqeyi tələb edən bir sahə olduğunu daim vurğulayan Nəcəf Nəcəfovun adı bu gün də Azərbaycan mətbuat tarixində xüsusi ehtiramla yad olunur.