Çin Xalq Respublikasının Sosial Elmlər Akademiyası nəzdində Modernləşmə Milli Akademiyasının nümayəndələri Bakı Dövlət Universitetində (BDU) olublar.
BDU-dan bildirilib ki, nümayəndə heyətinə BDU-nun tarixi, elmi tədqiqat, tədris fəaliyyəti, beynəlxalq əlaqələri barədə məlumat verilib. Qeyd olunub ki, BDU-da hazırda bakalavriat səviyyəsində 78 ixtisas, magistraturada 243 ixtisaslaşma, doktoranturada isə 131 ixtisas üzrə kadrlar hazırlanır. 25 mindən artıq tələbəsi olan universitetdə 120 kafedra, 2 elmi-tədqiqat institutu, 22 elmi-tədqiqat laboratoriyası, 5 elmi-tədqiqat mərkəzi fəaliyyət göstərir. BDU Çinin ali təhsil müəssisələri ilə sıx əməkdaşlıq edir, ikili diplom proqramları həyata keçirir. BDU Çinin elmi qurumları ilə də müxtəlif istiqamətlər üzrə əməkdaşlığı genişləndirməkdə maraqlıdır.
Qonaqlar Çinin Sosial Elmlər Akademiyası nəzdində Modernləşmə Milli Akademiyasının fəaliyyət istiqamətlərindən bəhs ediblər. Bildirilib ki, Modernləşmə Milli Akademiyası modernləşmənin Çin modeli, nəzəriyyəsi, tarixi, digər ölkələrlə müqayisəli təhlili istiqamətində, sosial, iqtisadi sahələrdə araşdırmalar aparır. Azərbaycan qədim İpək Yolu və müasir “Bir kəmər, bir yol” strategiyası üçün çox vacib rol oynayır. Bu baxımdan Azərbaycanın aparıcı ali məktəbi olan BDU ilə əməkdaşlıq, modernləşmənin, sosial, iqtisadi siyasətin müxtəlif aspektləri üzrə araşdırmaların aparılması faydalı olacaq.
Görüşdə əməkdaşlığın müxtəlif istiqamətləri üzrə müzakirələr aparılıb, konkret təkliflər səsləndirilib.