Xalq şairi Osman Sarıvəlli (Osman Abdulla oğlu Qurbanov) doğum günündə məzarı başında yad edilib.
“Tehsil365“ “AZƏRTAC”a istinadla xəbər verir ki, Qazax Rayon İcra Hakimiyyəti və Azərbaycan Yazıçılar Birliyi Qazax bölməsinin birgə təşkilatçılığı ilə Osman Sarıvəllinin anadan olmasının 120 illiyi münasibətilə İkinci Şıxlı kəndində şairin məzarı başında keçirilən “Poeziya saatı”nda Osman Sarıvəlli sözünə, şeiriyyətinə, poeziyasına, şəxsiyyətinə dəyər, qiymət verənlər onun yaradıcılığından söhbət açıb, ünvanına səmimi ürək sözlərini səsləndiriblər.
Öncə şairin və onunla birgə eyni qəbiristanlıqda uyuyan övladlarının məzarı üstünə tər qərənfillər düzülüb, əziz xatirələri ehtiramla anılıb.
Azərbaycan Yazıçılar Birliyi Qazax bölməsinin sədri, Əməkdar incəsənət xadimi, şair Barat Vüsal O.Sarıvəllinin həyat və yaradıcılığı barədə tədbir iştirakçılarına ətraflı məlumat verib. Qeyd edilib ki, Osman Sarıvəlli 1905-ci il dekabrın 17-də Qazax rayonunun İkinci Şıxlı (Sarıvəlli) kəndində anadan olub. Orta təhsilini Qazax Müəllimlər Seminariyasında aldıqdan sonra bir müddət Göyçay rayonunun Qaraməryəm və Bığır kənd məktəblərində müəllim işləyib (1926–1929). Təhsilini artırmaq məqsədilə Moskvaya gedib və orada Dövlət Universitetinin Filologiya fakültəsində oxuyub (1929–1932). 1937-ci ildə Azərbaycan Yazıçılar İttifaqına üzv olub. Bakı Pedaqoji Texnikumunda müəllim (1932–1935), Bakı Teatr Texnikumunda müdir (1939–1940), Azərbaycan Elmlər Akademiyası Nizami adına Dil və Ədəbiyyat İnstitutunda müdir müavini, "Ədəbiyyat qəzeti"nin redaktoru, “Uşaqgəncnəşr”də redaktor, Azərbaycan Yazıçılar İttifaqında şeir üzrə məsləhətçi vəzifələrində işləyib. 1990-cı il iyulun 2-də Bakıda vəfat edib və doğulduğu İkinci Şıxlı kəndində dəfn edilib.
Bildirib ki, Osman Sarıvəlli ədəbi yaradıcılığına 1933-cü ildə başlayıb. Həmin ildə "Gənc işçi" qəzetində "Ayaqsız" adlı ilk şeiri çap olunub. Osman Sarıvəllinin "Dəmir sətirlərim" adlanan birinci kitabı 1934-cü ildə işıq üzü görüb. Şairin təltif və mükafatlarını qeyd edən B.Vüsal bildirib ki, O.Sarıvəlli "Azərbaycan SSR xalq şairi" fəxri adına, "Oktyabr inqilabı", "Qırmızı əmək bayrağı", "Xalqlar Dostluğu", "Şərəf nişanı" ordenlərinə, "Əməkdə fərqlənməyə görə" medalına layiq görülüb. B.Vüsal Xalq şairinin “Dəmir sətirlərim”, “Bənövşə”, “Şairin hədiyyəsi”, “Gətir, oğlum, gətir”, “Gənclik eşqi”, “Bahar çiçəkləri”, “Yeni dünyanın qapısı”, “İqlimdən-iqlimə”, “Sabahı yaradanlar”, “Seçilmiş əsərləri” (üç cilddə), “Hər kim yüz il yaşamasa”, “Mən sabaha gedirəm”, “Kür qırağında”, “Aşıq ürəkli şair, şair ürəkli Aşıq Şəmşir”, “Qüdrətli şair, ustad sənətkar” adlı kitabların müəllifi olduğunu diqqətə çatdırıb.
İllər ötsə də, böyük şairin hər zaman ehtiramla anıldığını, əziz xatirəsinin daim qəlblərdə yaşadığı bildirilib. Gənc yazarların bu gün də həmin poeziyadan bəhrələndiyi qeyd edilib. Azərbaycan poeziyasında yeni mərhələnin açılmasında Osman Sarıvəllinin danılmaz xidmətləri olduğu vurğulanıb. Bildirilib ki, O.Sarıvəlli Azərbaycanın, doğma Qazaxın adını, şərəfini, şöhrətini öz əsərləri ilə hər zaman uca tutub, yaşadıb.
Tədbirdə Xalq şairinə həsr olunmuş, eləcə də özünün vaxtilə qələmə aldığı şeirləri səsləndirilib.
Aşıq Saqif Məzəmli Xalq şairinin şeirini saz havası üstə təqdim edərək əziz xatirəsini ehtiramla anıb.