Bu gün Azərbaycan ədəbiyyatının görkəmli nümayəndəsi, nasir, kinodramaturq, tərcüməçi Ənvər Qafar oğlu Məmmədxanlının vəfatının ildönümüdür.
"Tehsil365" xəbər verir ki, 1913-cü il fevralın 28-də Göyçayda anadan olan Ənvər Məmmədxanlı Azərbaycan ədəbiyyatına silinməz iz qoymuş sənətkarlardandır. O, həm bədii nəsr sahəsində, həm də kino sənətində uğurlu yaradıcılığı ilə tanınıb.
1938-ci ildən Azərbaycan Yazıçılar Birliyinin üzvü olan Ənvər Məmmədxanlı uzun illər “Azərbaycanfilm” kinostudiyasında ssenari redaksiya heyətinin baş redaktoru kimi çalışıb (1946–1964), bir çox məşhur filmlərin ssenari müəllifi olub.
Yaradıcılığına və ədəbiyyata verdiyi töhfələrə görə Əməkdar incəsənət xadimi (1963), Xalq yazıçısı (1987) fəxri adları ilə təltif olunub.
Ənvər Məmmədxanlı 1990-cı il dekabrın 19-da Bakıda vəfat edib. Onun zəngin ədəbi irsi bu gün də oxunur və dəyərləndirilir.