AMEA-nın Nəsimi adına Dilçilik İnstitutunun Toponimika şöbəsinin müdiri dosent Elçin İsmayılov və Müasir Azərbaycan dili şöbəsinin aparıcı elmi işçisi dosent Sevinc Məmmədova Türk Dil Qurumunun təşkilatçılığı ilə Ankarada keçirilən IV Beynəlxalq “Ad Bilimi (Onamastika) Bilgi Şöləni”ndə iştirak ediblər.
“Tehsil365” xəbər verir ki, tədbir çərçivəsində Sevinc Məmmədova “Sosial mediada nikneym-rəqəmsal şəxsiyyətin yeni imzası”, Elçin İsmayılov isə “Kəngər-Konqor-Kəngərli” mövzularında məruzələrlə çıxış ediblər.
Bilgi şöləni türk xalqlarının ortaq mədəni irsi sayılan adlandırma ənənələrinin araşdırılması, bu sahədə çalışan alim və tədqiqatçıların bir araya gətirilməsi, eləcə də yeni elmi əməkdaşlıq əlaqələrinin qurulması məqsədi daşıyır.
Tədbirdə Türkiyə, Azərbaycan, Qazaxıstan, Qırğızıstan, Özbəkistan, Türkmənistan, Rusiya, Macarıstan, Hindistan, Albaniya, Bosniya və Hersoqovina, Şimali Makedoniya və digər ölkələrdən onomastika mütəxəssisləri iştirak ediblər.
Bilgi şöləni Ankarada təhsil alan azərbaycanlı tələbələrin musiqili proqramı ilə işə başlayıb. Türk Dil Qurumunun sədri professor Osman Mertin də iştirak etdiyi yekun iclasda iştirakçılara sertifikatlar təqdim olunub. Tədbirin yüksək səviyyədə təşkili və səmimi mühiti Türk Dil Qurumu rəhbərliyinin Azərbaycana və Azərbaycan alimlərinə göstərdiyi xüsusi rəğbətin ifadəsi kimi yüksək qiymətləndirilib.
