19 dekabr 2025-ci il tarixində Bakıda "Bəhai İcması Azərbaycan mədəniyyəti və multikulturalizmi kontekstində" mövzusunda əhatəli konfrans keçirilib. Tədbir Azərbaycanın multikultural dəyərlərinin, dini tolerantlığının və bəşəri ideyaların təbliğinə xidmət edib.
"Tehsil365" xəbər verir ki, Konfransda ölkənin tanınmış dövlət, elm və din xadimləri, ictimai təşkilatların nümayəndələri və xarici qonaqlar iştirak ediblər. Tədbirin əsas məqsədi Bəhai İcmasının dəyərlərinin Azərbaycan cəmiyyətindəki tolerantlıq və multikulturalizm mühiti ilə uzlaşmasını nümayiş etdirmək olub.
Çıxış edənlər arasında Bakı Beynəlxalq Multikulturalizm Mərkəzinin İcraçı direktoru Rəvan Həsənov, Dini Qurumlarla İş üzrə Dövlət Komitəsinin nümayəndəsi Aslan Sultanov, “Simurq” Azərbaycan Mədəniyyət Assosiasiyasının prezidenti professor Fuad Məmmədov və vitse-prezidenti, Mədəniyyət Səfiri professor Səlahəddin Əyyubov, Azərbaycan Bəhailəri Milli Ruhani Məhfilinin katibi Ramazan Əsgərli, Bəhai İcmasının İctimai Əlaqələr Ofisinin koordinatoru Mirhüseyn Seyidov, professor Əzizə Cəfərzadənin oğlu və davamçısı Turan İbrahimov, 250 illik gizli tarixi film rejissoru Kəmalə Musazadə və avstraliyalı bəhai musiqiçi Con Varney yer alıblar.
Professor Səlahəddin Əyyubov öz çıxışında Bəhai dininin tarixi, dəyərləri və Azərbaycandakı fəaliyyəti barədə ətraflı məlumat verib. Təqdimat zamanı Bəhai İcmasının dünya miqyasında apardığı humanist və maarifləndirici fəaliyyətləri əks etdirən slaydlar nümayiş etdirilib.
Çıxışlarda tolerantlığın, qarşılıqlı hörmətin və dini dözümlülüyün cəmiyyətin əsas sütunlarından biri olduğu qeyd olunub. Vurğulanıb ki, müxtəlif mədəniyyətlərə və inanclara sahib insanların dinc və harmoniyada yaşaması Azərbaycan modelinin uğurlu nümunəsidir.
Tədbirdə səsləndirilən fikirlərdən biri tədbirin əsas ideyasını əks etdirib: “Biz müxtəlif olsaq da, bizi ümumi nöqtədə birləşdirən şey insan olmağımızdır.”
Konfransın sonunda tanınmış xanəndə Nəsrin Şəfiyi tərəfindən səsləndirilən muğam ifası tədbirə bədii və mənəvi dəyər qataraq iştirakçılarda dərin təəssürat yaratmışdır.
Bu konfrans bir daha göstərdi ki, Azərbaycanda dinindən və mənsubiyyətindən asılı olmayaraq hər bir icmaya hörmətlə yanaşılır və onlar cəmiyyətin inteqrasiyasında fəal rol oynaya bilirlər.
