İsrail Teymur oğlu Məmmədov 1 avqust 1963-cü ildə Ermənistan SSR-in Amasiya rayonunun Çivinli kəndində anadan olmuşdur. Atası Teymur Məmmədov, anası Bəsti Məmmədovadır. Ailədə beş qardaş və iki bacı ilə birlikdə böyümüşdür. Uşaqlıq və gənclik illəri Qərbi Azərbaycanın Ağbaba mahalında keçmişdir.
1988-ci ildə Ermənistan ərazisində yaşayan azərbaycanlılara qarşı aparılan zorakılıq və deportasiya siyasəti nəticəsində Məmmədovlar ailəsi öz ata-baba yurdundan qovularaq Bakı şəhərində məskunlaşmışdır.
İsrail Məmmədov 1990-cı ilin 20 Yanvar hadisələri zamanı baş verən proseslərdə iştirak etmişdir. Ermənistan–Azərbaycan münaqişəsinin silahlı mərhələyə keçməsi ilə əlaqədar olaraq, 1991-ci ilin oktyabr ayında könüllü şəkildə Qarabağ uğrunda gedən döyüşlərə qatılmışdır. O, Şuşa şəhərinin Kərkicahan istiqamətində aparılan döyüşlərdə iştirak etmişdir.
Döyüşlər zamanı göstərdiyi mərdlik və igidliyə görə döyüş yoldaşları tərəfindən ona “Ağbaba Qartalı” ləqəbi verilmişdir.
1991-ci il 28 dekabr tarixində Şuşa istiqamətində gedən döyüşlər zamanı İsrail Məmmədov döyüş yoldaşları ilə birlikdə erməni silahlı dəstələri tərəfindən mühasirəyə alınaraq əsir götürülmüşdür. Həmin tarixdən sonra onun taleyi barədə rəsmi məlumat əldə olunmamışdır. İsrail Məmmədov Azərbaycan–Ermənistan münaqişəsi zamanı itkin düşmüş şəxs hesab olunur və bu günədək nəşi tapılmamışdır.
İsrail Məmmədov ailəli olmuş, üç övladı vardır. Onun xatirəsinin əbədiləşdirilməsi məqsədilə yaşadığı ərazidə adına küçə verilmişdir. İsrail Məmmədov haqqında kitablar çap edilmiş, müxtəlif jurnal və qəzetlərdə, eləcə də qəzet səhifələrində materiallar dərc olunmuşdur.
İsrail Teymur oğlu Məmmədov Qarabağ müharibəsi zamanı itkin düşmüş Azərbaycan vətəndaşlarından biri kimi xatırlanır.
