Azərbaycan Dillər Universitetinin (ADU) Beynəlxalq şöbəsinin baş mütəxəssisi Zülfiyə Qurbanova, əcnəbi professor-müəllim heyəti – Konfutsi İnstitutunun əməkdaşları, Çin dilini tədris edən Çin Xalq Respublikasının vətəndaşları Li Jihua, Zhao Jingrui, Fan Jihao, Li Sha, Lin Ting, serb dilini tədris edən Serbiya Respublikasının vətəndaşı Branka Joksik Malobik, həmçinin sanskrit və hindi dillərini tədris edən Hindistan Respublikasının vətəndaşı Dhruv Trivedi “Miqrasiya, suverenlik və konstitusion hüquqlar” mövzusunda keçirilən konfransda iştirak ediblər. Konfrans Azərbaycan Respublikasında 2025-ci ilin “Konstitusiya və Suverenlik ili” elan edilməsi ilə əlaqədar olaraq 18 dekabr – Beynəlxalq Miqrant Günü münasibətilə Azərbaycan Respublikası Dövlət Miqrasiya Xidməti tərəfindən keçirilib.
“Tehsil365” bildirir ki, Azərbaycan Respublikası Dövlət Miqrasiya Xidmətinin rəisi Vüsal Hüseynov və qurumun yüksək vəzifəli nümayəndələri, Beynəlxalq Miqrasiya Təşkilatının səlahiyyətli nümayəndəsi və Azərbaycan Respublikası Milli Məclisinin deputatı çıxış ediblər.
Konfrans çərçivəsində, həmçinin Azərbaycanda yaşayan miqrant cənab Nick Nwolisanın Qarabağ və Azərbaycanın suverenliyinin bərpası ilə bağlı təəssüratlarını əks etdirən kitabının təqdimatı keçirilib, təqdimat zamanı videoçarx nümayiş olunub və müəlliflə video-bağlantı qurulub.